圖：會高潮眼既暴龍，個頭起勢咁擰黎擰去
敝司OLE Day，帶學生參觀科學館的「巨龍傳奇」展。和學生參觀科學館，某程度上是挺愜意的工作。手上那群怪獸雖然不太正常，但掹車邊總算是band 1，大多「惡唔出樣」，所以點好名放人入閘後便可隨意遊覽。本以為科學館就由生物學或考古方法講恐龍，學識分辨「暴龍係『Wao～～～』嗰隻定係鬼鬼祟祟嗰隻」（國產零零漆），結果竟然又係聞之色變的國民教育。大抵係所謂潛在課程（Hidden Curriculum），換個更普通的講法，即展覽當中亦有Hidden Agenda。
圖：有碌磁石棒挑釁下佢佢會有反應
全館有四個展區，展區一「多媒體劇場」就只是一小段3D動畫，第二區「機械動樂園」比較好玩，只是有條「終極互動暴龍」據聞在暴龍前有動作，暴龍會有反應。所以有兩個女學生fing黎fing去玩完一輪之後，發現原來展區另一邊係有遙控器俾參加者遙控恐龍……（女學生按：搞到我地好白痴）
展區三、四私以為係重點，三係「化石發崛場」，就係「介紹中國多年來在恐龍化石發崛和研究成就」（導賞手冊語），展出偉大祖國的化石發崛場同中國發現的恐龍複製品。包括中國「恐龍之父」楊鍾健教授遺像、「甘氏四川龍」挖崛場，同一列「巨型祿豐龍」（雲南祿豐縣）。展區四係「化石展示區」，分七個主題，但感覺仍以中國做主題，如展出「上游永川龍」（重慶發現）、洛陽中原龍等等。
舉《導賞手冊》做例子，如主題3「盛世巨龍」簡介分兩段，但中間就講中國發現的「炳靈大夏巨龍」和「巨型汝陽龍」化石有機會「問鼎亞洲以至世界最大恐龍的稱譽」；主題4「行跡與足印」就出現「中國近年在恐龍足印的發展扮演著舉足輕重的地位」；主題5就更明顯係「中國恐龍新發現」，講近一世紀恐龍研究使中國成為「世界恐龍大國」；主題7「從龍到鳥」亦主要講中國龍鳥如「中華龍鳥」、「聖賢孔子鳥」（！？）之類。書末就直接介紹中國六個恐龍專業博物館、7個恐龍公園及5個保護地……講講下以為香港科學館變成中國香港科學館了。
圖：聖賢孔子鳥
參觀完後發現展覽如此「中國特色」，認真翻查資料，發現《導覽手冊》的簡介和科學館官網的簡介，都無提及有關中國展品。只有翻到《導賞手冊》的「專訪」部份，才會看到香港科學館總館長薛雯講是次展覽係「重點介紹中國境內發現的多種珍貴恐龍和中國在恐龍方面的科研成果」……掛著「巨龍傳奇」這毫不起眼的主題，或許使大家以為睇恐龍展，結果變成參觀祖國崛起展了。那麼這展覽「有點速龍」。
當然，如果用「香港係中國一部份」的角度出發，自然不介懷香港科學館展覽中國恐龍成就。一如歷史博物館的「香港故事」，有意由自然地理形成出發，到新石器時代、再論及先秦南海郡、東漢李鄭屋漢墓…及至回歸，塑造「香港自古以來就是中國領土」(出自《基本法》序言)的印象。這本是世上政權建構身份認同的其中一種通例。只是在這麼敏感的時間，不知有心或無意的鬼鬼祟祟搞偉大成就展，還是有點那個。
雖然科學館宗旨應該係介紹同推廣科學，不過選擇展品當然係政治問題。既然科學館都有政治的，咁恐龍都有愛國的，應同此理。
另有關恐龍譯名參考閱讀：方潤(2014)，「Giant Dinosaur」
閒話：
1. 唔係好為意展館可否用閃光燈，但場內燈光閃爍，一堆操廣東話既香港同胞……其實個公民教育唔多夠
2. 場區太細，初初學校安排逛個半鐘，結果學生45分鐘左右便行完悶死了。
3. 恐龍D樣，根本同而家地球生物兩個樣嘛…其實恐龍係唔係外星人？
4. 恐龍一種稱霸世界既龐然巨物，抵受唔住氣候變化，反而花鳥蟲魚小強留左落黎。或者就如老子講「木強則折」，做人都係柔軟謙卑啲好。
圖：唔知點形容既外表，疑似外星生物
圖：呢隻叫「迅掠龍」又係唔知咩黎
圖：呢隻好似雞嘅叫「竊蛋龍」，以前以為佢會偷蛋，後尾發現原來係幫人孵蛋