有好多人唔参與香港依家嘅抗爭運動，佢地嘅原因係覺得有好多人從中抽水，例如有人抽水爭選票，有人甚至叫人捐錢，無論建制同泛民都無人真心為民請命，去抗爭就等於為他人作嫁衣，我以前其實都有差唔多諗法，不過後來我嘅諗法改變咗。
如果大家要食一碗飯，有好多人已經係果碗飯上面得益，例如係農夫同米商，我肯定當中有好多人都唔係為咗食飯嘅人好先攪包米出黎賣，我地會唔會為咗依個原因唔食飯呢？
好多人就會話食飯同抗爭“點同“，無得食會死架嗎，問題所在就係“點同“。如果有日政府唔管制米價，有商家炒到一千蚊一碗飯（假設無代替品），相信好多今日話人地暴民政治嘅人都會走出黎抗議政府，即使抗議係犯法。食飯同依家嘅政治抗爭最大分別係食飯對香港人係有即時利益關係，而政治抗爭的利益關係好似唔係咁貼身，甚至有人可能覺得同佢地嘅利益無關。
我就試下簡單咁講一個關於依家經濟同政治關係嘅例子。好多外國大行(金融機構)要係大陸投資, 點解佢地會揀係香港設立亞太區總部而唔係直接係大陸設總部呢？唔通貪香港租平？
不如引述一下香港金融管理局嘅原因係香港有"良好的法治體系和有效率的金融基礎設施"
http://www.hkma.gov.hk/media/chi/publications-and-research/quarterly-bul...
點解香港有良好的法治體系而咁多人對大陸嘅執法咁無信心呢？其中一個原因係我地有三權分立，就係行政、立法、司法分權進行因而能夠互相監察。
假設我地有日覺得執法不公（例如覺得被老屈），我地可以向立法會議員投訴甚至提出司法覆核。但係係大陸分分鐘可以由立法機構指使執法機構黎拉你，依個制度就係大陸出現嚴重官官相護嘅其中原因。最近習近平叫香港「三權合作」，有人要法官愛國做管治工具，根本就係破壞緊香港人嘅利益，仲要係利益嘅本源。
當有人一再侵害我地嘅利益果陣我地係咪因為有人抽水而抗佢反抗入侵呢？我地係咪要等一個無私嘅聖人出現先至反抗呢？唔通你反坑成功會一啲着數都無？唔通大家覺得抗爭成功後大家都有着數就大家都一齊繑埋對手攬炒？依個世界根本係無應唔應得依回事，而係只有你爭取唔爭取，當你自己連你需要嘅野都唔去爭取，人地就只會當你湯圓咁搓圓襟偏咁任玩。