今日我睇返蔡東豪九個月前的一篇文，文章名為《悲傷五階段》，「悲傷五階段」theory係有個博士研究患絕症病人，係佢地面對自己個病嘅五個階段，五個階段依次序是：否認、憤怒、討價還價、沮喪、接受。蔡東豪引用呢個theory，講述好多公司臨執之前都有呢五個階段。
相信大家都有睇過獎門人個個超級無敵開口中，我一睇到呢篇文，我心諗「呢鋪真係好嘅唔靈醜嘅靈」。篇文當中，蔡東豪形容一間公司臨執之前，「討價還價」嘅階段係：「討價還價時，管理層接受公司陷入困境的現實，知道不迅速找出新方向，面前是死路一條。」諗諗下，蔡東豪九個月前形容嘅其實就係主場新聞…
根據蔡東豪發表嘅死因裁判，主場嘅死，除左恐懼，就係「為唔到皮，計唔掂數」。恐懼黎講，除左叫佢啪返兩劑定驚茶補下身，我都諗唔到有咩解決到。但「為唔到皮，計唔掂數」呢點，其實所有睇主場新聞嘅朋友仔都確實要負返D 責任。
日日睇覺得主場新聞好過癮嘅朋友仔，除左幫手撳個like ，或者好慷慨啪埋旁邊個share 掣，其實一直都消費緊佢，無協助佢有足夠嘅銀彈去營運嘅。一方面大家踩旺左個場，但同時亦推佢埋牆。我地期望主場愈來愈好睇，但又永遠唔課水比佢洗。今日去7仔，我見到有人仲願意比廿蚊買新地雜誌，明周睇馬賽艷舞為誰跳，但我相信從來冇人諗過要比錢睇關心社會議題嘅網媒。
我好記得中學上art 堂，個Miss話有D 人做過research，D 人去羅浮宮每幅畫到底會引賞幾耐？我當時諗，D 畫咁堅，起碼分零兩分鐘啦。MISS話7秒，我當時真係相當嘅震撼，7秒短過打尿震啦，咪玩啦。但今時今日，我有時睇FACEBOOK，一篇佳作都留唔住我7秒，更莫講話要我課水比個作者，咁試問主場又點會為到皮？
主場死，大家嘅反應都係慳D 啦baby 個句：「我接受唔到囉」；但我相信，蔡東豪九個月前就已經接受到，而且佢篇文最後仲預計到大家對間公司執嘅反應：「公司將會崩潰，外間多數會把責任推卸到管理層身上，到時所有人將與管理層為敵，管理層將孤獨地四面受敵」
PS. 羅浮宮幅畫，D人都係每幅欣賞7秒，我係度想多謝肯由頭到尾睇哂我寫廢話再比個like 我嘅人，我知係唔會有人課水比我，但如果你睇完再肯啪埋個share 掣，我會好滾動囉。
九個月前蔡東豪篇文：
http://webcache.googleusercontent.com/search?q=cache%3AwnMi0Y2oeCcJ%3Ath...
原載於姐死姐還在Facebook 專頁：
https://www.facebook.com/164695310405483/photos/a.164701523738195.107374...