有留意東南亞足球嘅球迷，每每經過銅鑼灣渣甸坊天香牛什大王附近，個頭定必會向上望，因為唔知幾時開始，個度就有支阿雷馬旗掛左出黎。一路都好好奇，究竟旗幟入面係乜野光景，有人估係球迷基地，有人估可能屋主十分喜歡阿雷馬。今日就由喺香港打工既阿雷馬女粉絲(Aaremanita)帶大家解開呢個迷！
旗幟掛喺一樓，自然要行上去望過究竟。從樓梯行上去，就已經見到"Baso Arema"既貼紙砌在梯級之間，再行幾步，會見到另一塊巨型橫額，上面寫上"Baso Urat Arema"，配上一隻造型勇猛既獅子，以及一碗類似湯既物體。
轉多個彎，就望到門口。大門以藍色作主色，中央配上阿雷馬貼紙，上方則寫上"Baso Arema"。原來"Baso"喺印尼話係肉丸既意思，喺印尼無論街邊檔仔或者餐廳菜館，都可以食到Baso，係一款好普遍亦好流行既食物。而"Baso Arema"就係呢間鋪頭既名字，喺香港印尼女傭界相當出名，老細顯然係個阿雷馬既球迷吧。
開門入去，食客通通係印尼女傭，牆壁上所有告示，雪櫃內所有飲料都來自印尼，係一所十分正宗既印尼餐廳，當中大部份人都點左招牌既肉丸。肉丸以牛肉製成，丸裡面混上牛根，所以咬落會比較韌，每碗入面都有三粒。另外每碗Baso都會配以豆腐，麵條以及薄脆，佐以茄汁同甜醬油食用。
店舖入面除左食品外，亦有小量日用品等發售。老細身為一個標準阿雷馬球迷，店內當然佈滿大量阿雷馬精品啦，仲有小部分可供發售添！
大概，呢度係香港唯一售賣阿雷馬頸巾既地方。
**此為清真食店，所以大家去幫襯時，千萬唔好帶豬肉或者酒精飲品上去喇。