《Angelababy同都教授sell 緊「SPI 書包」》-- (懷念過去系列文章)
無可否認呢個係廣告主導的年代，原先冇問題的iPhone 4，一出左iPhone 5 之後就變得好唔智能。原先我只有一pair 咀，已經有大量lipstick，但睇完全智賢個咀，就會覺得買返支IOPE的23號唇膏先跟得上時代的尖端。呢個星期返工放工經過香港站，見到來自星星的都教授同埋Mrs Angelababy Lamborghini個廣告，我本身以為佢地sell 緊1997年瘋魔一時的SPI 書包，睇清楚先知係另一S牌子。睇到呢個廣告，勾起了我小學3年班，深受廣告毒害的一件往事…
小學3年班，係好特別的一年，除左因為個年係1997，我好多同學都「消失天與地」咁去左移民之外；我小學3年班的時候，有兩樣新產品係小學屆推出，大家當年都極力吹捧。個兩樣野就係白色波鞋同埋SPI 書包。
白色波鞋同SPI 書包真正推出的時間我真係唔知道，我只係知道，我個區的貧民小朋友，3年班的時候有齊呢兩樣野，係威過當時全班考第一。
回想起一二年班的時候，最令我自豪的，就係那對每次上完體育堂都自己洗到會反光的白飯魚，你唔洗乾淨對白飯魚，你隔日點同其他同學玩「踩腳」，對鞋唔夠白係record 唔到你比人踩左幾多野的。但3年班的那一年，唔知邊個新聞報導話白飯魚對兒童做運動的時候有損腳部 (我覺得好明顯個新聞報導Dr Kong 係有份贊助啦)；於是從那年開始，大家就好似由Nokia 彩mon 轉用智能手機咁，一個個同學，輪住換白色波鞋。3年班的我都好想換對白色波鞋，於是我日以繼夜，夜以繼日的同呀媽講「白飯魚真係著到隻腳痛，我真係矮左呀，我由第4行調位調前左一行呀因為著白飯魚」。終於，3年級的下學期，呀媽係學校團購左對$199的白色波鞋比我。
至於經典中的經典，SPI 書包，同白色波鞋同期出道。升3年級個時，市面上推出左兩款好抵死的書包。一款係融合師奶買餸車概念的「車look 書包」；另一款就係SPI 書包。「車look 書包」真係史上最stupid 的書包，本身個書包已經好重，仲要改裝加零件配個「車look」落去，然後小學冇lift，根本用唔到。更加Stupid 的係，第一代的車look 書包，一「咩」上身，個車look 就會look 到件白色校服有條黑色印，就好似你衝地鐵門，比門夾左一野個條痕一樣。由於「車look 書包」真係好stupid，更顯得擁有SPI 書包的人威水。2年班升3年班的時候，我個《為食龍少爺》書包已經out 左，我當時真係好想有個當年最受歡迎的紅色SPI 書包配返我對$199 白色團購波鞋。
當時，我覺得只要我一有個SPI 書包，再著返對$199白色波鞋，我真係威過威士忌。
如是者，過左半年，我真係覺得好好彩冇換SPI 書包，老實講，個SPI 書包真係好seven，成個龜殼咁，一排SPI同學企係度真係好似忍者龜。而最重要係，我班有個好seven 的同學，因為夏天「咩」SPI 書包，SPI 書包個護脊設計厚得濟，最後呢個好seven 的同學因為長期「咩」住個SPI，而背脊生熱痱，因為seven同學講左出來，最後比同學友笑左佢成年。
至於我對$199 白色波鞋，我一著上去就後悔啦。原來白色波鞋係咁焗腳的，而且「踩腳」遊戲亦變得一D 都唔好玩，因為踩到人一D 都唔痛。
$199白色波鞋沒有比白飯魚過癮，SPI 書包沒有比《為食龍少爺》書包耐看，正如而家「咩」個名牌手袋也不會重拾「咩」《為食龍少爺》書包時期的快樂。有時候，真的只能「懷緬過去常陶醉」...
原文載於「姐死姐還在」Facebook 專頁：
https://www.facebook.com/164695310405483/photos/a.164701523738195.107374...