新出爐的施政報告，被評是扶貧報告，只對基層施恩，忽視中產。更有多名自稱「中產」的市民打上電台問答大會發表意見。「中產」這個詞彙很模糊，但也很精準，只要你在這份施政報告冇一樣受惠到，都可以叫中產。但最慘其實係嗰啲兩公婆夾埋搵三、四萬的「次中產」，或者可以叫中下產，又或者低上產，唉！總之呢班「一係買唔到樓一係供到隻狗；年年交足稅，但係受惠一定冇佢」嘅人，就叫做「恨加慘」。
我哋呢班「恨加慘」，恨，恨政府忽視我們對社會的貢獻，恨地產霸權搞到啲樓價咁貴，恨我哋交咁多稅但畀人濫用；慘，就唔使講啦，有中產之名，無中產之實，高不成低不就。人哋綜援婦就揸BENZ而自己就逼巴士，人哋又雙糧、又花紅，仲好過做大公司，我哋要供書教學、交租供樓，又無律貼、又無福利，生活壓力大，前景迷茫，生活質素也許比窮人更慘。
不過，這是一個結構性問題，並不是一朝一夕可以解決。我想到既然無補於事，不如跳出框框，提出一個天馬行空的新概念，就是一改傳統倫理家庭系統，提倡「多元夫妻制」。一直以來現代社會都是奉行一夫一妻制，好多時要兩份人工夾埋先做到中產。但如果實施一夫多妻或多夫一妻，甚至兩夫兩妻，將組成家庭的單位數提升，咪可以直接增加家庭入息中位數囉，到時唔單只中產，「新奇士產」都有得你做。
（以上僅亂嗡當秘笈，只供參考）
轉載自新報