文：劉定堅
C.實戰經驗
要成為成功的創作人，實戰經驗比一切都更重要，我常以TVB編劇作例子，一個編劇每年約負責兩個劇，每劇寫5集，捱足十年寫了100集，算是二十個劇只分三種類別，即十年下來每個編劇對任何一種題材只有寫過約三十集的經驗，實戰少得咁可憐，叻得去邊！十年過後仲升埋做編審，懶得寫，死未？
用腦跟跳舞、繪畫其實分別並不大，首先最好跟到名師(我無咁好運)，繼而是強逼性的不斷實戰，腦要常用才可能腦活神通，究竟自己分析出來的創意能否經得起市場考驗呢？有人話創意靠靈感，我常說凡是提出不科學、不能驗證字詞作解釋答案的人，都是狗屁不通的廢柴，靈乜叉嘢感吖，創作靠的是思維方法，不同創作有不同的思維模式，實戰令自己的一套方法運作暢順，自然得心應手。譬如對市場的瞭解、基礎功力如何、腦海幻化影像的能力、對人生哲學的認識、文字功力、對建構人物性格的能力…，無靈感？痴孖筋！創作到俾一百億你會唔會無靈感吖？你即刻掟橋掟唔仃啦，結果仍是唔掂，因為你未夠料，無好的思維方法便難以推論出最佳答案！
無咁多機會實戰？冇問題，自己創造機會，學我啦，每日睇戲寫個影評，自然有四方八面認同或批評，勇於表達，堅持己見，及後再檢討，喂，我撈咗三十年仲勁操，你又想做創作人，唔咬緊牙根拼命點追呀？
除咗蒐集資料、分析記錄及實戰經驗外，提升創意還有些法寶，例如買部大電視加環廻音響，這樣能令自己在接收信息上更具震撼效果，在敏銳度不足下，可以更容易感受到別人作品的特色，從而更能留下印象，加強學習效果。
不要怕蝕底，有的咁多機會都要全力以赴，作品創作出來了，經驗便多一分，有冇錢收係其次，當你工作堆滿咪次次都可以要求對方先付費囉，寫咗唔用無事㗎，日後可以賣俾其他人，但自己已多一次創作經驗，實力增強了一分。萬事以創意為先，你有料，自然好值錢，駛乜急啫！
附注：作者劉定堅三十年前創作《蝦仔爹哋》，開創盧海鵬無釐頭金句，創下處境喜劇神話記錄的劉定堅，八十年代轉戰烽火連天的港漫市場，創作了最輝煌年代的《中華英雄》，並成為極少數的代表，只憑藉創作人身份，建立個人出版企業《自由人出版集團》，創作並出版了包括《刀劍笑》、《超神Z》、《狄克戀曲》、《賭聖》等等大批經典漫畫作品；及後進軍小說市場，《刀劍笑新傳》開創了周刋武俠小說神話，憑逾百部作品打開了中、港、台三地市場，經過長時間投入電影及動畫創作及製作，年多前開始進軍國內影視市場，身兼編劇、導演、製作人及投資者四合一身份，繼續挑戰更複雜的龐大市場，延展創作生命。