話說，在地球亞洲的某一角，有個聲稱為國際動感大都會的城市，名為香港；當地政府見社會輿論指城市用電太多，造成浪費，因此五年前與兩間電力公司制定節能目標，豈料搞出一籮籮荒謬戇居之事，慳電居然都可以激起千重膠，實為世界一大怪聞也！
環境局「求其膠」
話說當年環境局與兩電簽定條款，求其定出港燈每年慳300萬度電及中電慳1200萬度電的節能目標；聽起來好似好多，但其實只佔兩電一年售電量0.03%至0.04%，強積金佔市民月薪比例都高過佢，真係少到得啖笑！
中電「搵笨膠」
中電協助客戶做能源審計和節能措施，每年成功慳1600萬度電，超額完成利潤管制協議所定的節能目標。根據協議，中電每年可以多賺1700萬元額外回報，作為公司達標的誘因。
你以為呢Ｄ額外回報係由政府找數？非也，中電會將呢筆錢計番入電價之中。換句話說，中電客戶要掏荷包夾錢「鼓勵」佢做節能。咦？唔係話慳電可以慳錢咩？點解咁搵笨，市民仲要俾番錢中電？
港燈「無力膠」
明明節能目標已經低到連蘇格拉底都覺得唔好意思，可惜港燈堂堂一間大公司，居然連每年幫客戶慳區區0.03% 電都做不到。原因無他，因為不達標都不用受罰，大可以視慳電為浮雲也，可憐市民和環境就遭殃了！
因為恐怕有日會出現「沒有最膠，只有更膠」的情況，令市民和環境進一步遭殃，地球之友特別為此「節能三膠」舉行「最膠慳電事件」選舉，市民一齊用手選出他們認為最膠中之膠的慳電事件；而我們希望市民在輕鬆投票的同時，亦關注政府與兩電進行的利潤管制協議中期檢討，促請他們停止派膠，真心誠意地為市民及環境著想，制定切實可行的節能目標及細則！
投票截止日期為4月29日晚上11時59分，結果將於5月2日發表，請密切留意地球之友facebook 專頁的最新資訊！
「最膠慳電事件」投票專頁： http://foe.org.hk/plastic
香港地球之友facebook fanspage: http://www.facebook.com/foe.org.hk