今次的佔領行動，除了誘發出香港人的愛心與團結外，更盡顯出香港人的幽默搞鬼，有人創作出啜核粗口歌、有人改編《美少女戰士》主題曲向私煙「致敬」，在這個漫長又令人繃緊的佔領行動，這些有趣惡搞的確能調劑情緒及緩和氣氛，更能補給士氣，令行動持之以恆，但我最深感受是那首能擊退暴躁惡勢力的《生日歌》。
點解一首《生日歌》咁大威力？究竟《生日歌》關佔中乜事呢？其實，就係因為佢唔關事，正是因為它的「無厘頭」，將衝突徹底瓦解。當有一兩個反佔中人士起哄搞事時，全場人一起唱出《生日歌》，那個阿叔阿嬸的皺眉無奈樣，與現場拍掌唱歌的人群臉上漫畫式興奮表情，形成出最傻眼的反差，相映成趣，現場看過一遍，真的會捧腹大笑起來。
最後反對人士當然是知難而退，跟不講道理的人，有時是不用講道理，使出一招「無厘頭」佢真係吹你唔脹，今次這招「唱生日歌」以柔制剛，再次見證「無厘頭」文化的威力。
「無厘頭攻擊」在日常生活其實也可多用，除了減少衝突外，更可以一笑泯恩仇，為世界添上歡笑聲。就好似當女朋友發晒脾氣說：「你有冇搞錯，用晒啲洗頭水又唔去買，你叫我用乜呀！」，你可以回答：「用愛膚堅啦！」；又或者如果有mk仔黑社會兇狠地跟你說：「旺角我睇晒！」，你大可回答：「我打開地圖，地球我睇晒！」
轉載自《新報》