短打一：就黎屎都寫一餐？
文：面包師
我不嬲都唔關心啲傳媒大佬點樣鬥來鬥去，但係睇到方向報尋日用左三大版，講廉政公署點查肥佬黎，仲以為係咩重大新聞添！
點知大嗱嗱三版紙，老廉揸住咩野証據？冇講。老廉查到肥佬黎啲乜？冇講。 立法會議員要申報咩野利益？又冇講。啲捐款點變成賄款？又又又又冇講。
咁講左啲乜？咪講下佢點樣出街呀，心情點樣唔好呀，點樣俾啲記者撞到呀，幾點返公司呀咁……
唔夠字呀？再寫埋李卓人同Mark Simon幾時出街呀，幾時買餸呀，幾時湊仔呀，幾時返屋企呀，咁囉……如果連咁都寫得一餐，真係就快連佢幾時去廁所疴屎，都可以寫個：「黎生受查壓力大，疴唔出屎噩夢多」！
其實，方向報話哂都係傳媒公器喎，冇理由為左寫衰對家，不惜功本，寫埋哂啲咁嘅野湊字數，有冇搞錯呀？仲好意思每份收我地六七蚊？買個包，食左佢，仲實際啦！
短打二：呢種「醜聞」真離奇－－玩讀者乎？
文：講理塘邊鶴
香港地講道理架嘛，肥佬黎生做過咩，我唔知亦對有錢人興趣不大，但無論有定無，入人都要入得有道理嘛。
昨日方向報頭一、二、四版，拎左嚟刊登自己生意競爭對手同阿仔食飯、老婆送阿仔番學、頭和咀撞到攝影機、神情呆滯、行路有低過頭...然後又話李卓人戴鴨舌帽遮面「如常」去超市（但張相裡李卓人頂帽係反戴，面容清晰喎......）
老實，以上報導到底與公眾利益有乜關係？報紙頭幾版喎，睇人湊仔？賣個廣告，收益都多錢過肥佬捐俾李卓人的錢多多聲啦！方向報真係好捨得喎，唔通佔中在即有任務乎？！
香港各大政黨都收政治捐獻，如果捐錢俾自己理念相同的組織都算係賄賂，唔通1989年以來幾百萬香港市民都賄賂支聯會?再講近些，就我住那條屋邨個建制派社區幹事，成日都大量蛇齋餅，兩屆區議落選都仲有鬼咁多錢，到底邊到嚟？
睇番個報導，果個「秘密捐款實錄」，啲資料係邊個講架？廉署話架？黎生自己話架？銀行爆料呀？（香港銀行咁爆料仲有人幫襯嘅？）
泛民議員在立法會點嘈都無用就大家都知，黎生呢種有錢傳媒人更唔會唔知。賄賂和捐獻的分別，就係議員收左錢做唔應該做的事。根據方向報的邏輯，似乎係想話， 早前盛傳各大銀行疑受政治壓力在壹傳媒抽廣告果單野，呢個時候就有議員動議辯論呢單野係咪與打壓新聞自由有關。但係人人都知，在這個商家大晒的社會，人地要抽廣告，就算動議立會辯論，寫信去商家到求情，都唔會實質改變到啲公司董事會的決定架嘛，如果咁就想入人賄賂，寫到似塵塵咁，但諗真啲，原來係睇唔明架喎，玩讀者咩？！