（純粹懷念過去系列文章）
早兩日，新聞話美國有個節目，比個gameboy班細路，睇下佢地有咩反應。有個死靚仔話：「我老豆收埋一個」，再有個死靚仔話：「我見過有隻iphone套係咁樣嘅」。原來，真係唔使「上樓梯覺得關節痛」先知自己老架。
班細路彈到個gameboy一文不值，毫無潛力；你班細路知唔知我曾經為左玩你地眼中一蚊都唔值嘅 「玩具」，付出左幾多努力。
- 由於家窮四壁無玩具，我主要都係自己同自己玩黑白。二年班的暑假，我用左兩個幾鐘，對住屋企塊牆，對打左1000下黑白，我即刻衝去同呀媽報喜，呀媽仲叫我向2000下挑戰，我當時真係覺得自己身手好敏捷，當今有邊個好似我咁連打1000下黑白完全無甩beat。
- 除左玩黑白，我都周不時數腳毛，但有時見到一個毛孔有兩條腳毛，都好困惑，唔知當一條定一條半。
- 就好似大雄成日去呀福屋企痴玩具玩一樣，我都成日去比較有錢的親戚玩佢地D玩具。我成日去表哥度，佢最鐘意同我玩play station打街霸，我真係鋪鋪都好專心的撳，好多時我都勝出。如事者，過左3個月至半年，有次我表姐都黎埋，佢狂笑我白痴仔，原來我表哥次次都較computer mode比我打，我個半年，只係不停好似撳燈掣咁撳個手製，根本冇玩過。但唔緊要，只要有得掂到舊玩具我已經好開心。
- 有一年的聖誕，我家姐儲左50蚊，係小童群益會買左副二手大富翁返來。我地真係好珍惜副大富翁，用左幾日時間， 用透明膠紙，用過膠的原理，痴哂所有的銀紙先開始玩。雖然我每次同家姐玩大富翁，佢都會send我去坐監，一鋪大富翁我通常都坐5至10次監。但都唔緊要，有得玩，我真係心滿意足。
- 冇MYTV重溫節目的年代，我表哥會用錄影機錄哂一星期的美少女戰士，但佢話變身集集都一樣，佢會撳fastforward 12 倍比我睇變身。但我都唔介意，我知我可以轉動我眼球快D 來迎合個節奏。
正如有錢佬好難好開心，窮人執到一蚊都當執到金。而家D細路連IPAD都一人一部，點會明白掂下舊玩具都可以好開心。
我仲記得第一次參觀「玩具玩斗城」個種震撼，無論個度有幾多細路，玩具的數目都係多過細路架，真係供過於求，呢鋪唔洗同人爭啦。我踏入barbie 專區，真係所有嘅產品都係「姣婆恩物」，岩哂我。當我見到部自製貼紙機，我就諗起原來唔洗用透明膠紙痴得咁辛苦，有自製貼紙機就可以幫我副大富翁銀紙過膠啦…
話說回頭，我唔覺得而家的細路擁有ipad比我對住塊牆對打1000下黑白更快樂。正如大富翁用電子貨幣，亦唔會更加好玩。玩具嘅野唔一定高智能就會好玩左，可能出個古代版大富翁，將D地方轉做牡丹樓，羅洛林呀咁，比個算盤D細路學計數，佢地覺得仲過癮呢。
早幾日，我睇完gameboy新聞，搵返我個副50蚊嘅大富翁，見到張「機會」卡寫住「繳交薪俸稅一百元」，我真係好想喊，如果而家都交一百元，你話幾好呢。
PS. 我個日去「玩具玩斗城」見到人頭湧湧，我諗起一件事；我呀媽係1986年個時(當時我都未出世)，大大公司封笠個日帶我家姐去搶平玩具，比TBB新聞影左出來，我呀媽呢幾十年來去親「玩具玩斗城」都會講一次我知佢上鏡。我真係好想得到個日的《當年今日》，比呀媽睇返。如果有朋友仔知點樣得到，話我知呀 。
你冇返咁上下年紀，你點會知咩係大大公司，哈哈哈哈哈……
細路見到gameboy新聞及片段
原文載於姐死姐還在facebook專頁