Facebook 今日死左個一刻，我真係相當恐慌，我個刻完全係同《家有喜事》李香琴冇電視睇個心情一樣：「冇 Facebook 點算呀，世界末日架啦」。如果我唔係係office，我已經咆哮左出來啦。
我就好似《妙手仁心》的林保怡幫病人做心肺復甦一樣，喪「猜」個 F5，我平時瘋狂撳lift 掣訓練有數，剛才我真係每秒鐘 100 野咁連環F5。
當我如火如火如荼的搶救我個 Facebook 的時候……
- 個手機 whatsapp 不停震，此時此刻，原來朋友仔都嚇到幾乎瀨屎，要 double confirm 係咪只係自己瀨野上唔到。對於打工仔來講，冇左個 Facebook 同送我上太空執行任務，同地面斷左聯絡一樣咁大獲。
- 同一時間，我呀姐就打電話比我，話我做咩比條錯嘅公司 Facebook game page link 佢。如果唔係體諒佢智商偏低同冇朋友，我真係好想殺入佢房，大巴大巴掌摑佢同祝佢早登極樂。
根據我呀姐「都是你的錯」的 default setting，上年8號風球放假係我腳頭唔好引發的；佢電腦hang 機係我用念力咀咒佢的。個 Facebook game 顯示唔到一定係我搞出來架啦。呀姐又好似《大時代》丁蟹上身咁，公司個 Facebook game 停左，佢震撼到如同公司股票停牌一樣，進入精神失常的狀態。
這邊廂，呀姐只係擔心個 Facebook game 點解消失天與地 ；另一邊廂，香港很多人都恐慌網絡監控係唔係打到來？個世界就係咁，有人長期唔關心社會問題，到底佢係唔係要歷盡七七四十九個苦難，先會醒覺，反思同關心下「係咪個社會發生緊咩事」。
終於終於，我「猜」左成半個鐘 F5 之後，個Facebook 就好似林保怡係急症室最危急的時候，用個燙斗較到360，「辣」返醒個病人一樣，有返心跳啦。
係唔係網絡監控？Who knows? 但今次預演左一次「沒有 Facebook 會如何」，原來真係好恐怖，我真係會好珍惜仲有機會發聲的日子，如果等到網絡certified 的時候，一切都真係太遲啦。
PS. 放工的時候，我同個F5掣一樣冇哂朝氣。我再細心觀察個 keyboard，F5 比我撳到同佢身旁的 F4 同 F6出現左高度差距，我同F5今日經歷左一場大戰，我比呀姐撳扁的同時，F5 都比我撳扁了。
再PS. 個Facebook 咁難得比我「辣」返醒，大家like 完不如撳埋個share 呀，有勞啦...
原文載於姐死姐還在 Facebook 專頁