全球化步伐加快，語言統一規模擴大，令地方語言文化受到威脅，全球四分之一嘅語言正面臨絶種嘅危機。廣東話雖然未成為全球四分一瀕危語言之一，不過近年中港急劇融合，香港文化明顯「大陸化」，令唔少人開始關心本土文化嘅命運，尤其是教育局暗啞底想令人覺得廣東話係香港「非法定語言」，仲有聯同語常會一齊推廣普教中，搞到今日有七成小學同兩成半中學成為普教中學校，施加行政壓力同改變教育制度威脅廣東話地位，就令唔少人擔心廣東話同香港文化會唔會有朝一日喺哩個世界上消失，要走入大學嘅語言資料館先搵得返。
群情洶湧
咁所以而家香港人對守護香港文化同廣東話，真係可以用群情洶湧嚟形容。除咗有各種監察香港公共空間正(繁)簡體字使用嘅組織之外，亦有人以考據廣東話文化來源來提升香港語言文化嘅歷史價值，更甚嘅，亦有人製作「匪語表」警剔香港人使用「大陸字」，用好多例子證明廣東話有文化過普通話，香港文化高尚過大陸文化嘅證據。為保護廣東話同香港文化嘅生存空間，香港人今次都算係乜嘢法寶都出齊咁濟。
有人可能覺得上面啲方法好激進好唔理性，但係今日香港急劇大陸化嘅環境下，民間用哩啲方法回應，絶對可以理解。之不過，哩啲方法唔少流於神經反射動作式嘅原始回應，只係喺出現一啲「大陸字眼」嘅時候回應，甚至用到「匪語」哩個充滿住對立同敵意嘅字眼去形容大陸文化入面嘅用字，長遠只會加深中港矛盾嘅鴻溝，何況係於全球化環境下，對香港文化復甦未必有直接幫助。
其實香港月光一樣圓
大家要知道，人之所以病，除咗係外來細菌病毒入侵，體質虛弱亦都係主要原因。今日香港文化俾其他文化由多方面侵蝕，其實係久弱成病嘅結果。大家應該發覺，除咗近年香港媒體越來越考慮大陸受眾嘅觀感改變用字外，香港文化界（尤其電影業）為打入中國市場不惜遷就大陸觀眾嘅文化品味，埋沒香港嘅文化色彩，唔單止中港文化交流出現明顯嘅「逆差」，亦削弱咗香港文化出口嘅機會。仲有，香港嘅文學書寫亦都甚少視廣東話入文為正式嘅香港文學創作，廣東話字詞多數只係作為消費香港色彩嘅小點綴，而唔係好似「書面語」咁用來寫成篇文。何況其實香港成個社會環境都係被灌輸一種「香港文化係『低俗』」嘅意識，香港嘅中文教育更加係主動懲罰寫廣東話字嘅學生。所以話，今日香港本土文化不斷沒落，除咗係大陸政府施壓干預，亦都係香港普羅大眾覺得「外國嘅月光特別圓」，覺得外語文化高檔過、有內涵過香港本土文化，所以香港文化好耐都得唔到重視。
不過大家只要留意一下啲流行專欄作家嘅文章，都會發現廣東話入文越來越普遍。書寫粵文，除咗係本土文化對全球化語言統一環境嘅一種在地回應，更重要嘅係透過公開展示粵文書寫，證明廣東話口語入文唔會影響傳訊，亦都可以登堂入室，來重新建立廣東話嘅文化價值，話畀大家知寫廣東話唔係一種禁忌。
本土覺醒 文藝復興
為咗推廣廣東話文化發展能夠遍及全港，港語學作為一個推捍衛同推廣粵語嘅公民組織，認為係時候畀大家認真嘗試同體驗廣東話文學創作。港語學希望粵文書寫提高到文學創作嘅程度，發掘廣東話文化瑰麗高雅之處。來緊六月十六號，佢哋就會舉辦廣東話徵文比賽，規模雖然唔大，不過都邀請咗李婉薇博士、歐陽偉豪博士同著名流行小說作家畢華流老師做比賽評判，亦會有獎金嘉許傑出嘅作品，用實際嘅收穫獎勵實際嘅行動，鼓勵大家對廣東話文學作出新嘅嘗試，為香港本土廣東話文化累積文化價值。
用廣東話寫文章，其實唔難，與其要大家繼續坐喺到等，見到外來文化嘅時候先作出反擊，不如請大家一齊加入行動嘅行列，主動將廣東話入文變成書寫習慣。港語學希望今次比賽，可以成為大家為本土文化復興行出嘅第一步，用實際嘅行動，支持香港本土，支持廣東話，為建設廣東話文化價值同延續廣東話生命力嘅運動之中出一分力。