《誰吃素誰嚇大》
濫法從苛證暴狂，眾生微願不曾亡。
國運從來難恃力，民心自古可維邦。
橫流怎截覆舟水，破帽能禦頂頭寒。
六十萬人今披甲，風吹浪打敢擔當。
首先是一個所謂局長不顧身份，跳出來威嚇，隨口噏指你們參與民主派初選就可能違反國家安全法。還要煞有介事，講到明是指你們違反了那幾條。嘩，涉及國家安全喎，幾大劑！強國依家面對緊好嚴重嘅國家安全問題！你哋唱某首歌，叫兩句口號，或者對國旗不敬，都有可能令國破家亡。其實大家應該信邊個？或者應該信那一次？一時就講到強國咁強咁巴閉，不是吃素的，隨時可以威嚇世界各國，要他們付出代價，邊個夠膽令佢阿爺唔高興，就隨時挾走佢幾件子民，告佢走私販毒又得，告佢嫖妓有得。但另一時，就講到強國只係豆腐渣，甚至連豆腐渣都不如，稍為有點風吹草動，就會危害國家安全！究竟邊個係真？
威嚇完你哋唔好參加初選，仲可以大條理由，遲啲DQ埋所有非建制派都得。但香港人就是嚇大的。你越係搵啲不成理由嘅理由出嚟威嚇，大家就越是不會賣賬。結果兩日之間竟然有超過60萬人出嚟參與一個在憲制上沒有約束力的民間初選。
這兩天，我去過不少票站觀察過。烈日當空、三十幾度、又潮濕，企喺度都全身濕晒。但竟然有些票站有幾百人在排隊等候，輪候時間由幾十分鐘到成個鐘都有。排隊的乜人都有，有老有嫩，有男友女，個個都係普通人。面對打壓，面對威嚇，但都面無懼色。如此天氣下排隊，個個都沒有怨言，沒有投訴，沒有燥動。有人話「點解個投票程序咁麻煩」，但講完還是乖乖繼續完成相關程序。有人唔記得帶地址證明，但也不怕麻煩，上樓攞返落嚟，繼續投票！
整個投票過程秩序井然，見不到有幾多警察。事實證明，只要警察唔好做埋啲無謂嘢，香港社會可以好有秩序，根本唔需要警察！過去一年，問題就是太多警察做得太多無謂嘅嘢，警察成為問題根源。另一點觀察就係一個涉及差唔多十分之一人口活動，竟然見唔到啲政府官員，建制議員出嚟睇吓。梗係啦，危害國家安全喎。正是他們這種離地，正是由於此等騎在香港人頭上的所謂達官貴人不肯正視現實，正是這一種完全脫離市民的脈搏，才會令到這幫人以為通過國家安全法可以搞掂香港人。
外交部發言人說，中國不是吃素的！但顯然這幫人都是不吃人間煙火，自以為是之輩。外交部發言人又說，中國人不是嚇大的。但這幫人顕然都是不斷要靠威嚇才可以尸位素餐，香港人才是最有資格說自己不是嚇大的。
怎樣說都好，要靠制定一套這樣的法律來威嚇香港人，說明了他們是什麼質素！面對這樣的無理威嚇，仍然有這麼多人冒著熱浪參與這一次投票，也說明了香港人的質素！香港人好嘢！