我覺得依個年代嘅細路仔同細路女都好可惜，永遠感受唔到以前卡通盛世嘅時代。
話說早排去左做義工，幫手帶一班五年級小學生去社區參觀。為左帶動氣氛，我係架旅遊巴上面拎住支咪同佢地講:「橫掂仲有一段路程先到，不如等我唱歌比大家聽！」
學生們聽罷即時起哄，於是我就問：「想我唱寵物小精靈定係數碼暴龍？」
點知，車上所有學生都臉帶疑惑，好似唔知我講緊咩，有啲話聽過個名但未睇過。
我再問：「咁其實你地依家睇咩卡動片？同埋聽緊咩歌？」
點知答案係一大堆我未聽過，又疑似韓星嘅名，而且佢地平日放學都要去補習，返屋企都係上網，仲邊會開電視睇? 同埋依個年代嘅卡通片更不值一提......
以前無線亞視播嘅卡通片真係陪住我地長大，好多套都好好睇好有意思 。
簡直就係童年回憶產物! 但依家好多小朋友連龍珠都冇睇過，女仔連美少女戰士都未睇過，極其量都只係聽過個名。
其實真係好懷念以前卡通片高峰期，特別係八、九十年代，而以下落黎嘅卡通片你又識幾多？
反斗劍神、小孩子的玩具、幽遊白書、咕嚕咕嚕魔法陣、龍珠、為食龍少爺、鬼神童子、中華一番、數碼暴龍、皇家雙妹嘜、飛天少女豬事丁、寵物小精靈、熱血最強、男兒當入樽、浪客劍心、四驅兄弟、神風怪盜貞德、棋靈王、百變小櫻、不思議遊戲、忍者亂太郎、新世紀福音戰士、亂馬1/2、櫻桃小丸子、超級小黑咪、婚紗小天使、魔劍美神、飄零燕、長腿叔叔、熱血排球、外星毛查查、天才小魚郎、高智能方程式賽車、地獄老師、大咀鳥、超速搖搖、微星小超人、BomBom彈珠人、哈姆太郎、行運超人、BB保你大、晴天PIG PIG、辣妹掌門人、反斗小王子、蠟筆小王國、IQ博士、超魔神英雄傳、徽章戰士、怪盜聖少女、魔法騎士雷阿斯、神風怪盜貞德、踢出我天地、魔動王、傻版疆屍、機動警察、鋼鐵神兵、狂歡三寶、銀河醒目女、超人迪加/超人帝拿、高達、異空大冒險、三眼小子、蠟筆小新、叮噹、遊戲王、足球小將、丁滿與彭彭、金田一之少年事件簿、聖鬥士星矢、娛樂金魚眼、黃金勇者、足球風雲、疾風無敵銀堡壘、鬼太郎、熱鬥小馬......
我隨手咁數都數左三十幾套，仲要唔止咁少，依堆卡通片簡直就係童年回憶黎。
我覺得同依個年代最大既明顯分別就係……
以前不分男女老少都會睇卡通片，我地仲會公開討論，非常開心 ，男仔會睇美少女 , 女性化嘅卡通片，女仔都會睇男性化嘅卡通片，我地嗰陣完全唔覺係問題，反而成為大家嘅話題。
依個年代，你講卡通只係話毒，唔好同人講你有睇卡通，一講出黎就話毒或者低b，更何況睇女性化嘅卡通?
以前嘅卡通片，重點講「勇氣」、「友情」、「夢想」，我地都係帶住熱血成長
而家嗰啲，「賣肉」、「萌」……頂佢個肺，你話個世界而家似乜？
仲有……唔止卡通好睇，歌都係重點，簡直就係唱到街知巷聞，啲主題曲真係好好聽，唔理日文又好，廣東話又好，一樣咁正，以前仲有兒歌金曲頒獎典禮就知以前卡通片熱潮幾重要同盛世！
依家你同依個年代嘅小朋友講以前卡通，佢地都冇無興趣睇，佢地根本唔知以前嘅卡通係幾咁神，係幾咁好睇……
卡通片真係一代不如一代，好可惜佢地無咁嘅童年回憶。
嗚呀！好懷念係小學操埸扮小智甩帽轉身一野掉個精靈球出黎大叫：「出黎啦！噴火龍！」之後啲同學仔就扮噴火龍跳出黎係到鳩跑。
以前睇卡通片係一種潮流 ：
播數碼暴龍，全香港細路都會玩數碼暴龍機；
播天才小魚郎，就勁多人去釣魚；
播寵物小精靈，全香港細路都會打GAMEBOY玩 ；
播超速搖搖，全香港細路都會玩搖搖……
圖為我最鐘意嘅卡通片數碼暴龍01，依套根本唔係一套簡單嘅卡通片，入面又熱血，又感動，又講兄妹，兄弟手足之情，友誼，真係咩元素都有，會睇到好熱血，會感動到流淚 ，好睇到痴線。
最令人心痛係太一明明同阿空係一對，但最後竟然比MK大和食左，而太一永遠只有亞古獸！
屌！原來數碼暴龍嘅角色關係，係嗰時已經咁寫實！
唉，真係「仲未遇怪魔，我已經變大個」 sad……
（題為編輯所加）