內容:
最近喺度諗，假如立左國安法我哋之後嘅生活係點。
大部份喺反送中運動有參與、表態嘅人，都已經開始覺得好危險，無晒安全感，急急腳刪除以往嘅紀錄。
另一方面，強力部門嘅跟蹤、滋擾持續，多位議員、民主派人士已經受害（包括黃之鋒、袁嘉蔚），最怕呢啲資料就變成日後踩點嘅素材，一個唔覺意就用一架七人車將呢班民主派朋友綁走。
係呀，香港可以腐敗到咩程度，根本就唔會有人想像到。
而呢種對人生極大嘅insecurity，呢幾年喺政治風眼嘅人都會感受到。
16年當選，我做左9個月立法會議員後被人大常委釋法DQ，喺17年8月再坐埋監。當時嘅香港又點會諗到中共會用咁嘅方式去奪走人民授權，以及將和平抗爭者重刑收監？
但香港沉淪嘅速度，遠超大家想像。17年頭開始，陸陸續續有多年魚蛋中被控暴動嘅朋友被判刑，由3年到7年不等，已經證明律政司以及司法體制將會加入鎮壓大隊。
去到19年，警暴、嚴刑拘捕，更加猖狂。香港已經係軍管狀態，集會自由被剝奪，言論及思想自由亦即將被中共封殺。
去到而家，「今日唔知聽日事」嘅不安感喺我地心邊縈繞著，無時無刻都諗呢一刻嘅生活，可以喺預見未來分崩解析。
我明呀，真係明。
但係我地無任何可以逃脫嘅辦法。移民又點？重新適應，同時亦係花費極多心力，遙距睇返香港狀況。個人離開左，個心都會喺度。
唯一可以做，就係令香港變得無咁差。用盡全力。
就好似明知要坐監，有人入私飯、入書信，喺監獄外幫你既家人做情緒支援，議員會不斷關心同埋照顧你既需係，係絕對有幫助。
就算香港一路跌落去，我地都要有一股力量，不斷托返香港人上黎。
而家唔係絕望嘅時候呀。
一年前後，你仲記得你嘅初衷嗎？
揹起行裝，繼續遠征－－我哋都未放棄。一齊撐落去，可以嗎？
版權: