《搞臭江山保國安》
跳梁治港只半場，此身何托費週張。
自封沐猴撥烽火，狼糞堆煙保國安。
香港曾經有過三位特首，但除了第二任曾蔭權可以說是完整地完成了第二個任期之外，其他兩位都是不得善終（讀得書少，唔知有冇用錯成語）。
曾蔭權雖然是半途接任，第一個任期並不完整，但總算是完成了第二任才任滿退場。他事後惹官非是另一回事，但確實可以算是打完了那份工，把一個特首的第二個任期完整地做完。
第一任特首老懵董任內搞到天怒人怨，最終以腳痛為由半途落任，大家都知道根本係咩事。但老懵董作為一個平庸之輩的最大優點就是無自知之明，所以落任之後仍然不時擺個老細款，一而再、再而三召見記者發表他的偉論，大有繼續要指點江山的氣勢。可能佢到依家都未發覺，好多記者願意應召出席，只不過當係一個訪問前任特首的採訪任務，有部份記者甚至只是抱着睇睇今趟老懵董又會爆出乜嘢笑料的心情赴會。但老懵董又真係從來唔會令各界失望。最近有一次再出發記者會，他帶着口罩飲水那個經典影像，就蓋過了再出發究竟想講乜。
至於原本N屆都唔選嘅思歪，當年以爆冷打敗隻豬的勝利者姿態登上特首寶座，也贏得了五年時間證明了他自己多年前曾經對自己作出過的預言，他「唔係搞政治嘅材料」。佢甚至可能乜嘢都唔係。他從一上任便向全世界說明什麼叫做毫無誠信！五年任內，他四出點火，撩事鬥非，最後搞到連建制奴才派內部都擺唔平。搞到要阿爺出手，喺思歪已經擺明車馬開始咗佢嘅競選連任工程時叫停。明眼人都睇得出，唔通佢真係要用多啲時間照顧家人咩。擺到明就係打完半場就俾老細調咗出場，唔到佢決定。對於思歪，如此下場當然十分冇癮。
佢又冇做戲做全套，落任之後不甘寂寞，似乎都冇乜擺幾多時間返屋企照顧家人。但禮賓府又已經俾林鄭進駐，就唯有週不時返去前特首辦公室，睇睇蘋果日報、數吓廣告、做吓鍵盤戰士，而且還要繼續撩事鬥非。一時就要呢個人交待乜，某人交待物；一時就質問呢個，質問嗰個；一時就要求民主派做乜做物，總之就冇時得閒，但根本就冇人理佢。過去兩年多，佢嘅人生可以說是對社會十分無聊兼無謂，但係佢自己似乎十分充實。阿Q總以為自己十分重要，以為趙老太爺冇咗佢唔得！
但林鄭唔爭氣，可能又一時間令思歪突然燃起了被翻閹的幻想，以為有機可乘，可以再打多半場。據有傳聞說，有一些人一年多前已經頻頻聚頭，又四出活動，似乎係想幫佢助攻，都唔知係咪真，但思歪也似乎真的是越來越高調，做埋啲嘢都唔似所謂國家領導人嘅。
這一次，當佢阿爺決定搬出「國家安全」這個假招牌來破壞一國兩制時，思歪即時鬥志昂揚，第樣嘢佢就唔識啫，撩交打、搞亂個場，佢直頭係專業水準啦。於是，又擺出捍衛國家安全總代理的姿態再戰江山。日前在北京接受電視網絡訪問時，已經鬆毛鬆翼，難掩興奮雀躍之情。這一次又食髓知味，更是要向代表了英資財金龍頭的匯豐銀行開炮！可能佢已經唔記得咗香港匯豐背後的大金主係邊個。他也可能唔記得咗1989年六四事件發生後，有某位今天已經變得又紅又藍的臭老九，也曾經叫人擠提中銀，懲罰中共，最後搞到要唔認數，仲要賴咗落司徒華處來尋求脱身！
呢場戲其實幾好睇。不過更加有睇頭嘅，可能係預計一下究竟思歪會唔會真係有機被翻閹！林鄭顯然就已經被安排在未來兩年把哪喳嘢做盡，跟住就要睇吓用邊個在未來五年收拾殘局，林鄭似乎就唔會再有份！唔好睇淡思歪呀！共產黨有咩做唔出！京官用人嘅眼光，大家都唔係未領教過㗎啦。記唔記得老懵董其中一個搞笑金句：當人人都反對嘅時候，就知道係做得啱嘅，一定要做落去！呢套邏輯其實都好有代表性，好能夠說明乜嘢叫做中國特色或者強國邏輯。看來思歪大可以繼續努力，要更積極㧓他自己的狼糞，玩一鋪烽火戲諸侯，總之就要搞到烽煙處處，或者真係會氹到已經忍咗香港人好耐嘅佢阿爺笑到𠹳𠹳聲呢！
有啲人開口就中國文化，埋口就中國歷史，但其實都係中國文化及中國歷史嘅文盲。知唔知還是次要，就算知都唔識得吸取教訓，同完全唔知根本冇分別！當年周幽王為博美人一笑，烽火戲諸侯，結果搞到群雄並起，最後西周淪亡。以為玩大佢就一定有高回報，但歷史一再講俾大家知，唔少人只係想蒼咗個心！