保皇黨就係鐘意拎呢啲九唔搭八嘅句子撈埋一舊，然後就話KO左某某某。
受眾腦殘，自然會有如此低質造圖。
「立法後第一個舉報你」
李梓敬都忽忽地。我洗咩你舉報？I am on the list and I knew it. 想做紅衛兵攞彩，Sorry你遲左了。
早兩日當有風聲傳出時，畢竟我都做過議員，我就嘗試問一啲踩住建制圈子嘅人問佢知唔知搞咩，佢覆左我兩隻字：
「睇路。」
其實一年前逃犯條例修訂時，都一早聽到好多風聲，話I was on the list. 當然包括埋敝組織黃之鋒先生。
而早兩個星期，郭榮鏗議員都一樣榜上有名－－只不過係on DQ list。其實把刀係降左喺佢頭上，只不過無斬落黎。
而宣佈要立逃犯條例一年後，我都喺香港，仲未坐監，仲未被送中。
點解？想DQ Dennis時，大概因為勢色唔對，懸崖勒馬，用左一種更有技巧嘅方式「欽點」左個內會主席。
而我嘅處境，或多或少，都係香港人救左我。
所以，yes I am on the list，而且唔洗西門先生同我講。心理準備？有，但我仲想要多好多時間做。每個人都會有自己想做嘅野，想陪伴嘅人。
但我已經算好彩。百幾位手足已經還押，琴日拘捕左超過180位示威者／路人，其中有啲係以暴動罪被捕。
而暴動量刑起點，大多數個案係6年。
6年。
如果中共頒佈左國安法，如果當時我係喺香港受審而無被送中，可能都未去到6年呢個數。
所以，唔係話歲月靜好，而係我知道所有野得來不易。至少有上百個，未來可能上千個香港人，都比我更少時間做心理準備，去面對長期牢獄，面對與家人分離，面對日復日枯燥日子。
相比之下，我坐過嘅監，又算得啲咩呢？
作為唯一一個去過美國國情諮文嘅民主派、同國務卿Pompeo會面、出席兩次國會聽證、同唔同議員打交道……是旦一樣，都可能夠俾中共搵籍口煮死我。
而我係無收受任何利益，亦無外國護照（同樣無BNO）。如果我係因為利益而從政，大概我就唔會擔任立法會議員時捐約一半人工出黎，仲要處理歸還部分立法會津貼。
及後數年，喺民主派圈子搞campaign、做政策，到目前為止，銀行戶口應該比大部份同齡人士存款更少。去美國讀書，我係拎學校嘅獎學金，並且以優異成績完成左第一年嘅課程。
而耶魯係私立大學黎架，學校獨立批出嘅獎學金根本唔會經美國政府影響。講院校自主、學術自由，可能你地小粉紅嘅腦袋未消化到。
我唔會怕北京有任何所謂「勾結」證據，因為根本唔會有。
唯一會有，就係誅心論嘅政治動機，就係要砌辭老屈。呢樣野，只有立國安法先做到。
立國安法，唔係要制止示威，因為現實條例上已有充足（刑事罪行條例、公安條例、社團條例）去制止所謂用暴力嘅抗爭；
佢而家要做嘅，係要置放恐懼、以言入罪、引入思想警察，加上有國安駐港，充當「逃中」機制。
所以，無論係6月立定8月立，只要共產黨想無中生有、煮死任何一個民主派，甚至唔聽話嘅本地商界精英，有國安法簡單係輕而易舉。
所以我係完全唔明白點會有商界反對逃犯條例，而又贊成國安法－－阿爺吹雞，你連家當都唔要，連自己底褲都送埋？有無咁醜呀？
可能有，我亦明白，但我完全唔會做得出。
對於政權，我嘅信念好簡單——一個正常國家係應該要有合法、和平嘅執政黨輪替機制，而呢樣野就係民主。
要結束一黨專政，落實民主政黨輪替制度，就好似90年代台灣步向民主、或甚其他民主國家一樣，根本就係普世價值，係正常國家要做嘅事情。呢樣野同國家安全係完全唔一樣－－要求執政黨向市民問責下台，從來都唔會影響、威脅、破壞國家安全。
只有暴君千秋萬世、暴政四處肆虐、逼害異見、逼害少數民族、逼害自由鬥士，先會影響國家安全。
所以，唔好再用呢啲垃圾句子話KO我了，簡單一句，你唔配。
你仲未到果個level。
同香港齊上齊落，榜上有名，與有榮焉。