今早本來諗住去睇學界決賽，尋晚專登早啲訓，仲教咗幾個鬧鐘，點知起身都成11點幾，啲鬧鐘比我整熄晒，電話都俾我拆咗舊電出黎，但我完全冇記憶，好彩唔係返工，否則又要睇咸報後面個頁喇。雖然冇做學生好耐，但都叫做過吓，都知呢啲係中學生盛事，本來想去重拾吓記憶，但訓到豬犀咁，重Q咩，可能個天都話濕鳩污糟邋遢油漆佬食撚屎啦重拾記憶冇你份，既然如此，只好去睇丁組。
今日喺粉嶺遊樂場有2場丁組，頭場北區對龍門，尾場西貢對瑞聯，不過頭場我就冇乜心機睇，睇尾場算。場波15點30分先打，時間多的是，於是乎決定由打鼓嶺行去粉嶺，做毒撚嘅好處就係咁，無拘無束，我鐘意訓到幾時都得，我都唔明點解有咁多人講到世界未日咁，『緣』呢啲嘢，好難講嘅，不如開心啲面對日子仲好啦。打鼓嶺行去粉嶺，之前行過好多次，最快紀錄都要一個鐘零六個字，其實有時間郁吓真係幾好，沿途仲可以欣賞吓風景，欣賞宏偉嘅山河以及中港一隔嘅景觀，簡直係毒撚的浪漫。
我由蓮麻坑路起行，經過老鼠嶺、週田村、木湖，途經深圳河及深圳羅芳，幾百年前呢度嘅居民可自由來往，勢估唔到今日成為兩個唔同嘅地方，然後經過新屋嶺，遠眺深圳黃貝嶺，幾百年前黃貝嶺同打鼓嶺嘅村民經常武鬥，打鼓嶺地名都係由此而來，今日黃貝嶺高樓林立，而打鼓嶺依然係一個鄉郊地，但我都係鐘意乜鳩都冇嘅打鼓嶺多啲，吹咩？
經過新屋嶺後就會進入文錦渡路，呢條路嘅景點就係比我碌鳩粗幾百萬倍嘅東江水管，不過我就冇乜興趣欣賞喇，在經過邊境檢查站、虎地坳、狗房、鳳溪、上水火車站，沿新運路直行、全程用咗一個鐘零零八個字。咦，呢段文咁熟？因為我Copy返上星期【丙組聯賽 — 淦源 6-2 沙龍元老】，只係將上水改做粉嶺，刪減咗返大陸買葡撻嘅一段，大佬，我咁行法慳成5個7咁多架，5個7可以買到好多嘢你又知唔知，2包250毫升檸檬茶、一大堆蜜蜂糖、兩包福字麵、一包出前一叮、3包營多、三蚊腸粉兩蚊魚蛋、一包免稅煙....人窮係咁架喇，未窮過可能唔會明白，1毫都係錢，依家巴士小巴都加價，我個頭一加就加成5毫，所以唔趕時間又有力咁我寧願行個幾鐘路，打鼓嶺行去大球場咁毒我都試過(不過要搭船)，行去粉嶺？濕碎啦！
言歸正傳，西貢暫列丁組龍頭，後面仲有葛士寶朋友、中西區苦苦相逼，換言之，西貢要升班，必要繼續勝利。而瑞聯15連敗肯定包尾，已經冇咩目標，有波入吓算係咁，所以我預測呢一場可能係大手交易。
上半場10分鐘，西貢已經領先4球，之後西貢喺16、22(PK)、27、35分鐘在添紀錄，半場完，西貢8-0瑞聯。下半場6分鐘西貢入波在黎屠殺，之後分別喺7(PK)、14、16、19、20、23、26、34、35、41分鐘在添紀錄，全場大炒瑞聯19比0。
西貢同瑞聯嘅實力有一大段差距，但瑞聯由頭到尾冇加重防守，只著重爭取入球，西貢基本上喺兩路暢行無阻，落底出波成功率90%，只係錯失好多機會。而今場瑞聯嘅守門員，應該係臨時頂上，基本上佢唔會點做飛撲動作，用腳救波多過用手，龍門球過唔到半場就一定，不過都叫救咗幾球而且落力提場及鼓勵隊友，輸0比19係大咗啲，不過就算輸到0比10都繼續嘗試進攻冇扮死，全場取得7次射門算係咁，俾啲掌聲瑞聯啦。