無線亞視續牌公聽會，有好多人支持亞視無線，我唔係想話咩，不過呢班人，個個拎晒幾頁紙既電腦打出黎既講稿，講黎講去，就係話兩台以前幾好幾好，又話應該俾機會，最好笑係有人話如果唔俾亞視續牌應該會有一百萬人上街遊行......
先講亞視以前，曾經係好，我直頭認為，亞視響劇既制作，無論燈光，場景都做得比無線現有的劇都要高水準，但係睇以前有咩用??以前做幾好但 ATV 呢10年做咩黎，10年唔夠時間唔夠機會俾佢??又有員工話，佢地其實做左好多節目，非常有質素，話市民唔睇唔了解就話佢唔好云云.....
其實佢自己已經講左 main point，市民唔睇，好節目?咩叫好，你話好就好?你節目冇人睇，可以有幾好，係好既，口耳相傳，就會好多人睇，你唔見人地外地制作既，係好的話，絕對有人口耳相傳，總會有人發掘佢既好，你覺得自己既野好，係好正常，如果你做完自己都唔覺好，咁就死得 la，但你會唔會係閉門造車?你有諗過我地想睇咩嗎?
至於無線，佢地制作有幾認真，大家有眼睇，劇集中，燈光差，呢 d 唔係叫打燈，佢o個 d 叫照明，但造成呢個結果係因為要同時3機拍攝，所以唯有 d 燈光亂黎，錯晒，上一個 shot 同下一個 shot 可以完全唔同光都得，無氣氛，當然，可能你會覺得呢d係行內人先會睇，行外人唔會理，好，我唔講專業的事，講其他。
古裝劇時空穿越，不停出現現代野，劇情經常不理現實，不作資料搜集d專業智識錯晒，最誇張係場景，我見過一場戲，係個演員隻手挨落去個天牢既石牆，石牆係陷左入去......
好，唔講細節，我當全部觀眾都盲既，咁講創意?你 d 劇，由以前到而家，你夠膽講有新意?相信香港觀眾睇到都估到晒你d劇情...講綜藝節目，唔係冇睇過，不過真係吸引唔到我睇，而且仲要可以獎門人由我小學可以一直食到今時今日，真係.......
我認為唔關 TVB 前線員工事，因為呢班只工響過左 HKTV 後，所創作既劇集水準，係幾何級數上，最低限度視覺上，win 晒，所以，相信節目水準既高低，完全取決於所謂既高層既態度。
TVB 都有好既地方，例如 j2 台，因為佢買返黎既節目唔錯，算係有 taste 既。而新聞台，仲可以算係自主中立，算係咁。
我唔怕得罪人講，呢班支持者(假設冇收錢/非員工)，一直仲活響過去既世界，完全睇唔到香港以外既高水準節目，唔通真係仲以為香港仲係當年亞洲華語電影一哥??點解年輕人唔睇電視，或者只係睇外地制作，因為我地係睇整個世界，我地知道天外有天，人外有人，所以我地理解現有既本地電視制作水準係處於什麼水準，香港，早已風光不再，否則點解 HKTV 當日不獲發牌，會有十二萬人上街遊行，因為呢班人睇到香港電視業既新希望，我地有睇到 HKTV 既制作，即使未到超水準級，但早已係高於現有電視台，呢個社會本來就係汰弱留強，ATV ，華麗地自我收工，總比最後被人收回牌照，應該來得更好。
至於無線，留下來也是好，因為，有競爭才有進步，只能希望，香港的娛樂影視事業能夠再次做出好成績，期望新電視台的出現。