852郵報消息：《環球時報》引述「幫港出聲」召集人之一的中文大學政治及行政學系前系主任鄭赤琰說：「驅蝗」運動反映部分港人國民意識薄弱，當局除要加強學校國民教育外，也應考慮學習前港英殖民政府，補貼香港公務員子女返內地讀書，認識國情.....
＊以往英國殖民政府，津貼公務員子女去英國讀書，係讀中學，唔係大學。呢D係公務員既「福利」之一，我諗起源係益英國來個班高級公務員，後來以示公平，就益埋其他本地公務員，用意唔係培養親英分子。不過就算有津貼，自己包底個份都幾鏞下，正式人出豉油你出雞，所以中下層公務員都好少享用到呢項福利........
一直以來，大把高官，送D仔女去英、美、加、澳讀中學、大學，而家一年閒閒地用幾十萬，佢地都心甘命抵，覺得物有所值。
你估佢地唔知返大陸讀書，無津貼都平一大截咩？你津貼多少就會改變心意，送佢地去大陸？你無野哇？就算學費食宿全免，都咪搞阿Sir啦。
除非你硬性規定凡係公務員，仔女一定要返大陸讀書啦，不過行得通至奇！
如果即刻周晒梁振英、林鄭月娥、吳克儉等人既仔女返來，送佢地去大陸讀書，我私人津貼一皮野又點話！
如果有個計劃係度，但只係自由參加的話，就算D高官父母肯，班90後靚仔，明知屋企有條件供佢去外國留學，竟然要去大陸讀，實會典地詐晒形囉！
仲有，你為乜只係將目標指向公務員？點解唔係全港市民人人有份？
＊2月21日是「國際母語日」（http://en.wikipedia.org/wiki/International_Mother_Language_Day），本文用港式粵語來寫。