老師，可能係最明白當差艱難嘅工種之一
大家都係叫阿sir；大家要管秩序；大家會受氣會比人侮辱⋯
你比人叫「警犬」、「狗」、「賤渣」，甚至被問候你老母，唔開心梗架啦。比人叫花名係唔開心，我啲花名十隻手指都數唔曬，之但係：
我唔可以叫番後生仔女「曱甴」；
我唔可以問候番佢地家人；
我唔可以野野致命武力打頭；
我唔可以打男生；
我唔可以摸女生，
咁點解你可以？
你可以拘捕，但唔可以私刑；
你可以拘捕，但唔可以性侵。
如果學校係一個所謂「社會嘅縮影」（其實這稱謂唔多準確，因為學校其實係一言堂極權式），都視上述暴行有刑責、犯天條。咁點解你做就唔犯法？你犯法卻可逍遙法外？一係你上頭容許/縱容/誤導/鼓勵；二來你自欺欺人，放低你嘅良知、人格、學堂誓言：「不畏懼、不徇私、不對他人懷惡意⋯」；三來同儕壓力、嘉許令你唔敢有獨立思考、或表達空間，甚至再而強化錯誤行為，集體墜進路西法效應漩渦。即集體知法犯法！
唔該幻想下我地教書阿sir用現在警隊口吻、策略對付學生，結果會點？學生提出問題，無論合理否，我一棍打頭。
若學生聚集堵塞課室走廊，堵塞校務處，一眾訓導就棍棍致命武力重打學生頭部？一眾男老師擘開穿裙女生大腿抬走？被制服嘅仍要膝壓其頭讓他多受折磨⋯ ？你認為咁都無問題？你認為你班夥記無問題？你阿頭咁嘅指令係一切「合法」指令？！記住，唔係人話合法就合法！係警察通例同香港法律話合法先係合法呀！如果人話合法就合法，去到打犯、明放打人嫌疑犯、男警搜女士身⋯都覺無問題，就全部都係rule by law。
簡言之，時下警隊嘅「嚴正執法」，係暴秦、元朝嘅法治；而唔係法律面前，人人平等嘅rule of law (即上至法官、特首；下至平民百姓都要守法嘅法治）！
如果用林鄭tone對學生：「我無錯，錯係你地。」「我無變質，變質係你地。」我惗唔比學生玩死先出奇。時下青年大把野叻過你，轉數快過你，電腦勁過你；有家底嘅分分鐘流動資金多過你。
你惗下師生比例1:30，人人改你一張圖，30張圖網上流傳你點收科？但依家特首1:2000000 。你30000警力+3000武警（？估計）要與民為敵？要重演89 64天安門？何必呢⋯⋯
話休累贅，我地教書阿sir同差人唔同係，我地OT無補水！咁樣惗開心啲呢？我比人話花名、改圖、問候，未又係要忍。係唔公平架啦，份糧包左架。
用番馬鞍山警署慈僧mode：只要惗遠啲，除左件制服你未又係市民。可能我地食早餐街市會撞倒；搭車會遇見；公園跑步又見面；你細路我會教；而你細路大左又可能教番我細路⋯ 只要惗遠啲，就唔會打得咁過癮；唔會知法犯法。
最後，以劉進圖先生所言總結，你可以拘捕年青人，但唔可以剝奪佢地人嘅尊嚴，同公民的嘅權利⋯ （鏗鏘說：本是同根生）