計埋今年，賀歲盃足球賽呢個香港球壇一年一度盛事已經舉辦咗32屆，今年賀歲盃由公民搞，參加嘅球隊有公民昆卡聯隊(昆卡係南美洲厄瓜多爾甲組球會)、俄羅斯超聯嘅FC薩馬拉、葡萄牙超聯嘅奧漢倫斯及日本J1嘅FC東京。
當然，戲碼黎計，對部分球迷而言可能唔係太吸引，昆卡、薩馬拉及奧漢倫斯都唔係所謂『主流』認為之『熱門球會』，其實賀歲盃改請球會後，每屆都有類似事件發生，2007年賀歲盃有港聯、中國U23、牙買加U23、澳大利亞U23，有球迷覺得，U23國家隊唔夠吸引。2008年賀歲盃有港聯、 夏德(克羅地亞)、蔚山現代韓國)、彭拿路(烏拉圭)，有球迷又話夏德、彭拿路冷門過頭，而且冇咩名球員。2009年賀歲盃有港聯、南華飛馬聯隊、布拉格斯巴達(捷克)、水原藍翼(韓國)，有球迷又話冇乜吸引力，有兩隊香港嘅，睇鬼？2010年賀歲盃有浦項製鐵、傑志、飛馬邀請隊，模仿義大利三角賽踢45分鐘，有球迷又話，摺咗佢啦仆街。2011年賀歲盃有南華、蔚山現代韓國)、天津泰達、廣州恆大(中國)，有球迷又話，中國球會我冇興趣。2012年賀歲盃有南華、廣州富力(中國)、清水心跳(日本)、城南一和天馬(韓國)，中日韓港齊集，有球迷又話，都係冇乜吸引力，清水心跳今非昔比。2013年賀歲盃有港聯、上海東亞(中國)、釜山偶像(韓國)、蒙通聯(泰國)，有球迷又話，蒙通聯收我過百？你睇埋佢啦！
所以今年公民搞又有球迷話戲碼點點點，我覺得好正常，戲碼呢樣嘢，好個人嘅，究竟要請啲咩球隊黎，先會所有人都會接受呢？呢件事冇可能發生嘅！值得入場與否，又係好個人嘅事，你覺得值得咪值得，你覺得唔值得咪唔值得，沒什麼。
今年賀歲波，我個人而言就好有興趣嘅，我欣賞公民起碼肯去請，W唔WFC就見仁見智，不過初一我走唔甩咁滯入唔到場，老老實實咁多年我未試過初一去睇賀歲波，我都唔想去拜乜鳩嘢年，但家家有本難唸經。我覺得作為一個本地波球迷，未試過初一去睇賀歲波，係一個人生嘅大遺憾。不過初一冚家要作客/比人作客嘅節目年年都有，年年冚家喺呢一日都要齊晒，已變咗我家傳統，其實揾藉口唔去拜鳩年都得嘅，但一年一次，揾藉口逃避唔去又好似好仆街，所以每次過年我都左右為難。
其實賀歲波入場我係唔會點睇戲碼，就算請仰光聯(緬甸)、三星(尼泊爾)、士砵亭(澳門果隊)呢啲超級WFC系列黎，如果我想去嘅，初四多數都會去，因為我純係覺得賀歲盃係其中一個屬於香港球迷嘅新年節目而已，戲碼唔係太重要。
我反而覺得可以請郁昆卡、FC薩馬拉、奧漢倫斯、FC東京黎，香港球迷已算幸福，一支係厄瓜多爾高原球會，一支係伏爾加河岸嘅球會，一支係葡萄牙下游嘅WFC球會，一支係日本首都嘅球會，做人有幾可可以現場睇到呢啲球會？你地睇吓印尼阿雷馬搞Menpora Cup ，會方話會揾一支有實力嘅外國勁旅黎，球迷興高釆烈討論緊究竟係邊支，點知最後阿雷馬公佈呢支有實力嘅外國勁旅就係菲律賓UFL半職業聯賽嘅Loyola Meralco Sparks(洛约拉)，所有球迷啞口無言，大家想睇FC東京定菲律賓冠軍Stallion F.C.多啲？