今日有多場甲乙丙丁聯賽上演，我就選擇咗黃大仙區舉行嘅丙組聯賽淦源 vs 虎門及乙組聯賽大中 vs 和富大埔。因為塞車關係，14：00先到達斧山道運動場，查問場監之下知道淦源領先緊1比0。
淦源喺丙組排名第3，隊中球員有港甲球迷熟悉嘅徐耀宗(前公民球員)、陸柏熹(前港菁球員)、哈成智(前南華、南區)，上季在隊嘅戴文成、鄺浩然等都喺到，實力上屬於丙組上游。至於虎門就暫時排包尾，球員有蔡家淇、李子朗、潘頌文等，冇任何前甲組球員幫助，上週以0比7大比數不敵駿其天旭，當日虎門只有11名球員到場。
喺上半季比賽中，淦源喺大坑東遊樂場以5比0輕取虎門，今日虎門繼續捱打，不過上半場虎門有2吓反擊做得幾好，就係射唔中目標，半場淦源領先1球。下半場虎門繼續捱打，14分鐘淦源開角球，徐耀宗接應隊友頭槌二傳頂入成2比0(未肯定，HKFA.COM公佈為準)。3分鐘後，淦源在擴大比數到3比0。24分鐘，淦源在靠一個地波遠射得手成4比0，完場前，虎門在失一球，結果淦源在一次以5比0輕取虎門。
今日斧山道運動場草地比上週更爛，又吹起陣陣大風，現場沙塵滾滾，當陣風一來，好比小型沙塵暴，水樽紙盒喺場內亂飛，現場比賽嘅球員食晒塵，我本來企場邊但頂唔順最後上看台睇，最慘係旁證，局食走唔甩，變咗沙悟淨。場地問題一直係香港足球嘅問題，唔好話乙丙丁聯賽，甲組都唔係好好多。
場波15：20分完場，即上蒲崗村道公園睇乙組聯賽大中 vs 和富大埔，跑上去都過鐘，黎到和富大埔已領先2比0，21分鐘卡立助攻葉佳射成3比0，31分鐘卡立單刀笠射成4比0，下半場54分鐘陳立明撞射成5比0完場，如非大中守門員多次力挽狂瀾，大埔贏8-9蛋不足為怪。
(入球時間HKFA.COM公佈為準)。
【香港乙丙丁組業餘聯賽，有冇存在價值？】
有冇存在價值？有啲球員踢香港乙丙丁組，擋係衛生波，擋係一週工餘時間可以郁郁運動下，呢啲衛生波唔同街場衛生波，同一啲私辦11人業餘聯賽相似，唔同嘅，就係呢個係香港足總所搞咁解。有啲年青球員踢香港乙丙丁組，擋係其中一種鍛鍊，雖然有啲對手戰意一般。
依家乙、丙、丁組，搞黎好似嘥氣，因為香港足球冇完善升降制，不過我覺得，儘管事實如此，儘管冇咩人睇，但香港嘅低組別聯賽仲有佢存在嘅價值，有啲現役香港隊成員，以前都踢過香港嘅低組別聯賽。
【盲撐港足行動完成】
《一個月甲乙丙丁睇到你仆街冚家鏟盲腸炎下照撐港足大行動》(簡稱盲撐港足行動)終於完成，係一個盡量每個月嘅4週抽時間睇4-5場現場比賽嘅性幻想飛機計劃(香港隊有比賽就香港隊行先)，每週甲乙丙丁各睇一場，因為香港足球唔止頂級聯賽嘅甲組，仲有乙丙丁組、預備組、女子聯賽及青年聯賽。今個月睇咗一場甲組、一場青年聯賽、兩場丙組、兩場丁組及一場乙組，終叫完成。
其實點解要咁做？因為我冇固定支持嘅球隊，既然如此，趁識行識走，趁有呢個心，點解唔行去睇睇呢？其實乜鳩撐港足行動只係我自己創造出黎，支持傑志又好，支持南華又好，支持東方又好，支持飛馬又好，支持公民又好，支持大埔又好，支持葛士寶又好，定係好似我咁超級花生佬，大家有個共通點，都係撐香港足球。