部分內容摘自日記
香港足球處於冰河時期之際，冇咩人會理，基本上似係等摺，仲會走入場嘅球迷，一係就係所謂死硬派，一係就係退休後無所事事嘅老人，一係就係無聊友。喺人嘅圈子之中，一個唔好彩，比人知道你睇本地波，分分鐘會俾人白眼，變成眾人嘅恥笑對像，不過，我從來都係本住『我睇本地波，唔係殺人放火，我冇罪』嘅心態去做人，面對同事、朋友質問，我都大方承認，係，我比較關注本地聯賽，因為……
【作為一名喺沙田威爾斯唔知幾多樓出世嘅柒頭皮，作為一名熱愛足球嘅戇鳩毒撚，睇返自己嘅地方嘅足球，係好正常嘅行為，特別係喺呢個最低谷嘅時候，作為一名死戇鳩毒撚，我都會嘆息，點解香港足球咁唔爭氣？所以，我更加唔可以咁易離開。】
講完呢句，有人感動痛哭，有人大叫香港有救，有人大叫神呀請你原諒我……發夢啦屌你老闆，講完呢句之後，只有一陣陣嘅恥笑聲，「呀……你唔好在講，笑到我冇力喇哈哈哈哈……」「哈哈哈哈戇鳩仔呀……」通常，我都唔會在出聲，因為，你根本唔需要在出聲。
某日早上，如常返工做奴隸，一早就被安排到天台機房工作，當時夏天到來，機房內有多種機器運作，又冇咩通風系統，我估計，氣温高達40多度，在場每個人都赤裸上身，雖然非常熱，但係我心情異常地好，因為，昨晚我在旺角場看了場好波，儘管要喺氣温高達40多度環境下工作，汗流如雨，但依然無損我心情。在場同事們似乎察覺到我心情靚，於是乎問我尋日收工走咁快做乜，係咪去媾女，去媾女唔預埋同事，係一件天地不容嘅事，我向來以誠實見稱，所以得罪唔少老闆，我當然講真話：「尋晚去咗旺角場睇咗場好波」，同事立刻答：「屌你老眉又係啲垃圾波」，我一邊工作，一邊充滿自信地回應：「我用60蚊睇咗場值回票價嘅波」，同事在答：「屌你咪又係啲垃圾隊」。「錯！！！！」呢個''錯''字我用咗Hardcore式咆哮腔叫出黎，係好撚大聲，好撚有力嘅，我察覺到，突如其來嘅咆哮，令沉迷工作中嘅同事們都嚇咗一跳。
「係本地勁旅，晨曦對
華
倫
西
亞
！」
講完呢句，在場同事立刻嘩然，因為華倫西亞係當時西班牙嘅勁旅，所以呢四個大字一出，非常轟動，在場同事立刻怪責我有好嘢收埋唔分享直斥我人格低劣，有同事問點解冇宣傳，我就解釋因為你地班大爺嘅問題啫，有同事問比數，我話晨曦小勝6比1，現場又在一次嘩然，乜晨曦咁勁？華倫西亞派青年軍？晨曦緊係勁啦，華倫西亞有多名國腳級球員，100%係Full Team，晨曦有喀麥隆國腳前鋒(*註1)，又有碧咸(*註2)，碧咸仲要射入埋招牌罰球，在場同事又在次嘩然，大家你一句我一句，對於錯過比賽有人表示非常可惜，有人談論華倫西亞嘅毛病，有人談論晨曦請碧咸黎客串要幾多錢……大家熱烈討論咗一粒鐘，差啲忘記有工作在身之際，我補充一句：
「呢支華倫西亞，係馬爾代夫嘅華倫西亞。」
說完這句話後，機房內一片死寂，這片死寂氣氛直到收工。之後，冇同事在夠彊同我傾足球。
註1：晨曦有喀麥隆國腳前鋒，其實並非全句，全句是【晨曦有喀麥隆國腳前鋒伊度奧好朋友亞古沙】，我唔記得講''前鋒伊度奧好朋友亞古沙''而已。
註2：碧咸 = 碧咸迪，我唔記得講埋個''迪''字咁解，碧咸迪 = 潘文迪，''碧咸迪''係潘文迪花名，當日晨曦6-1華倫西亞，碧咸迪的確寫入靚罰球。