2013年Indonesia Super League(印尼超級聯賽)(簡稱：印尼超/ISL)終於完結，因網絡發展之快，現時可以喺香港安在家中收睇外地聯賽直播，包括印尼足球聯賽，加上家人生於印尼，細細過已經聽過無數印尼嘅故事，有先輩都喺當地踢過足總聯賽，令我更有興趣了解呢個國家嘅足球發展，所以我由2009年開始主力關注呢個聯賽，擋係生活上除咗工作以外嘅其中興趣，等自己冇咁悶，唔係得個做字(得個做字仲要係冇結果)。09-10賽季起，每當收League時，我都會抽空寫一篇小總結(上季除外，原因 - 「懶」)，擋係為自己留下少少回憶，或者擋係參考資料，俾自己/有緣人日後參考，雖然我嘅首要關注聯賽係香港，印尼只係第二興趣，要寫都應該寫香港先，不過其實有唔少人寫港足聯賽總結，而佢地想寫嘅同我諗嘅好接近，而且佢地更識寫，有見及此，就寫寫印尼算吧。
近幾年印尼國內足球聯賽都「鬧雙胞」， 印尼足總Football Association of Indonesia(簡稱：PSSI)管理之印尼頂級聯賽Indonesian Premier League(簡稱：IPL)與Indonesian Football Savior Committee(簡稱：KPSI)管理之印尼頂級聯賽ISL並存，互相自稱為官方聯賽。
國際承認嘅印尼官方聯賽係Indonesian Premier League，但有趣嘅係，Indonesian Premier League關注度不及非官方之Indonesia Super League，比較強嘅球隊都集中喺Indonesia Super League，或者Indonesia Super League嘅勢力較強，最後PSSI與KPSI達成共識，來年印尼頂級聯賽、半職業次級聯賽、U21聯賽等低級聯賽在冇「鬧雙胞」嘅情況出現，會合二為一，來年印尼頂級聯賽會以Indonesia Super League之名出現，意味住Indonesian Premier League將會成為歷史。由於Indonesia Super League勢力較強，今年Indonesia Super League排名喺14.5位前嘅球隊會繼續留低參加下年嘅新賽季(第15位需要與次級聯賽「LI」嘅第4名打一場升降班附加賽)，而次級聯賽「LI」冠亞季軍會升班參加下年嘅新賽季，14.5 + 3 =17.5。另外4個位置就係由Indonesian Premier League頭4位所得，17.5 + 4= 21.5，升降附加賽有結果就會變成22隊，冇錯，來年印尼頂級聯賽如無意外有22隊。由於Indonesian Premier League未打完，所以今次所總結嘅係Indonesia Super League，即係ISL。
ps.以下球隊名稱，若果叫『Persi』，會譯『佩斯』，若果叫『Perse』會譯『佩西』。
2013 Indonesia Super League小總結：
冠軍：Persipura Jayapura(佩斯普拉)
降班：PSPS Pekanbaru(北乾巴魯)
Persidafon Dafonsoro(佩斯達弗)
Persiwa Wamena(佩斯華)(前譯佩西瓦)
總射手：Boaz Solossa - 25球(印尼)(佩斯普拉)
最大比數差距：Persela Lamongan(佩西拉) 9-1 PSPS Pekanbaru(北乾巴魯)
總入場人數：2百60多萬
最高入座王：Arema Indonesia(阿雷馬) - 376,742
最低入座王：Pelita Bandung Raya(佩利達) - 30,160
想了解更多，三姨婆都改得嘅Wiki幫到你！
2013 Indonesia Super League大小事記事錄：
2013年1月：揭幕戰由Pelita Bandung Raya(佩利達)對Barito Putera(巴力圖)，由前晨曦澳洲外援米路雲洛域頂入新賽季第一球，由於佩利達轉咗根據地，所以呢場揭幕戰入場人數只有1,000，場面非常冷清，係ISL由2008年成立以來揭幕戰最少人入場嘅一次。
前澳職射手Sergio van Dijk正式登陸Persib Bandung(萬隆)，引起球壇轟動。Sergio van Dijk香港譯做沙治奧雲迪克，荷蘭出身，身上有印尼血統，並且已經放棄荷蘭公民身分代表印尼國家隊，司職前鋒嘅沙治奧雲迪克職業生涯喺荷蘭甲組嘅格羅寧根開始，轉到乙組嘅赫爾蒙德後先開始有較多上陣機會，2005年在轉去另一支乙組球隊埃門，3年中射入32球，2008年開始去到澳洲發展並加盟布里斯班獅吼，上陣50次射入25球，2010年轉投阿德萊德聯，並於10-11球季成為澳職聯射手，不過近年甚少出場機會。
2013年4月：Pelita Bandung Raya(佩利達)對Persiwa Wamena(佩斯華)嘅聯賽發生球員打球證事件，佩斯華老將Pieter Rumaropen(盧馬洛賓)因不滿球證判決於是乎使出後勾拳「招呼」其，結果黃衫變紅衫，今次件事透過互聯網傳到世界各地，連唔少國際級知名球星都開聲話表示關注，最終盧馬洛賓被罰終身停賽。
2013年6月：佩斯查(Persija)嘅主場比賽閉門進行，球迷需要喺鐵閘外為球隊打氣真趣怪。日本動畫《灌籃高手》內，三井曾經講過：「安西教練...我想...打藍球」，呢句說話震撼咗唔小人嘅心。呢句說話可以換去『JAKMANIA』到：「阿sir...我想...睇波呀」。雅加達警方以安全為由將佩斯查對佩斯華嘅主場安排為閉門進行，令球迷需要喺鐵閘外為球隊打氣，成為世界奇景。
佩斯查對萬隆嘅印尼打吡舉行前席，萬隆職球員乘坐之隊巴被佩斯查足球流氓投石塊襲擊，最後萬隆職球員拉隊走人，萬隆班主接受電話訪問時講咗一句：「在前進，我們會被燒死。」最終球賽改期。
印尼蘇門答臘城市廖內省6月受到「林火事件」影響，空氣汙染，氣溫亦創新高，北乾巴魯對萬隆正好喺廖內省舉行，當時災區廖內省情況依然嚴重，據『南洋網』6月25日08:10發稿指廖內省多個地區的空氣污染指數已經超出400點，達非常危險水平，正當新加坡足球聯賽暫停，馬來西亞一啲學校宣佈停課時，喺廖內省首府北乾巴魯Rumbai Stadium舉行嘅印尼超聯依然如常進行，又成為星馬網民討論焦點。
2013年7月：於印尼超級足球聯賽Pelita Bandung Raya(佩利達)效力嘅前馬里國腳Sékou Camara(卡馬拉)於7月27日操練後突然心臟病發，送院後證實死亡，享年27歲。卡馬拉司職前鋒，2009年代表過馬里國家隊上陣1次，球員生涯去過南非落班，近幾年都喺印尼揾食。
7月31日，(佩斯普拉)以2比0小勝佩斯華後提前奪取聯賽冠軍。
冠軍：Persipura Jayapura(佩斯普拉)
成績：25勝7和2負
得失球：82球失18球
球隊射手：Boaz Solossa - 25球
巴布亞省勁旅佩斯普拉今季繼續係ISL嘅勁旅，並取得25勝7和2負進82球失18球嘅佳績繼續屈機，今年佩斯普拉繼續用巴西教頭Jacksen F. Tiago，呢位巴西教頭執教佩斯普拉多年早就對佩斯普拉運作非常熟悉，而佩斯普拉繼續以巴布亞原住民一線球員為本地班底，守門員繼續起用表現愈來愈穩健嘅南韓人柳在勳，而後防咁少失波，全賴一對外援中堅組合起作用，喀麥隆嘅「孖辮妹妹」Bio搭巴西人Otavio ，高波殺晒，Otavio高得來有速度且靈活，閘位有經驗豐富嘅Ortizan Solossa，助攻助守一流，中間有南韓人林俊星協助一對中堅，Imanuel Wanggai幫手傳送，Yustinus Pae、Gerald Pangkali兩路策動攻勢，利比里亞國腳Zah Rahan Krangar做第二前鋒，前面在搭射手Boaz Solossa，而後備嘅Lukas Mandowen、Yohanes Pahabol、Patrich Wanggai都有一定力量，佩斯普拉贏嘅就係分工方面清楚，冇咩點變，傳送命中率高，合拍，就係咁簡單。
亞軍：Arema Indonesia(阿雷馬)
成績：21勝6和7負
得失球：70球失33球
球隊射手：Cristian Gonzáles - 19球
東爪哇最有影響力嘅球隊阿雷馬與上季一樣分咗兩隊喺IPL及ISL參賽，而今年嘅主力隊就係ISL阿雷馬，未開季前ISL阿雷馬已經收購咗多名印尼超一線球員，後防有前喀麥隆國腳Thierry Gathuessi、年青力量Hasyim Kipuw、前鋒線上雖然缺少馬來西亞國腳Sali，但有前佩斯普拉巴西射手Beto、前斯里維加亞射手、聖基茨島國腳Keith Gumbs(基夫) 、印尼歸化國腳Cristian Gonzáles加盟，加上接收部分Pelita主力例如Egi Melgiansyah、印尼歸化國腳Greg Nwokolo、Victor Igbonefo等，最後在加埋原有嘅精英，未開季前已經被視為超級熱門，但季前熱身賽嘅失利令球迷擔心係ISL阿雷馬是否「雷聲大，雨點小」，幸好季初表現唔錯，更一度威脅佩斯普拉，最終屈居亞軍。今季ISL總入場人數比上季少，但阿雷馬球迷入場人數比上季增加58.2%，冠軍還是爭好遠，但總算有一點安慰。
季軍：Mitra Kukar(米特拉)
成績：19勝8和7負
得失球：60球失42球
球隊射手： Esteban Herrera - 11球
來自婆羅洲東部最有財力嘅球隊，佢地只係用土砲陣已經足夠應付一支中下游球隊，Syamsidar、Zulkifli Syukur、Zulham Zamrun、Ahmad Amiruddin、Jajang Mulyana、Raphael Maitimo、Hamka Hamzah、Ahmad Bustomi，個個都係當打嘅國字號，在加埋Ilija Spasojević、Esteban Herrera、Paolo Frangipane呢啲優質外援，所以未打前已經係爭標分子，季初試過連勝排第一，試過喺聯賽同佩斯普拉拗手瓜，不過咁多國字號都未必有用，因為佩斯普拉太屈機了，但米特拉冇因為奪冠機會消失而放棄比賽，至今已經10場不敗，更後來居上成為季軍。
第四位：Persib Bandung (佩斯畢)( 或稱：萬隆)
成績：18勝9和7負
得失球：72球失43球
球隊射手：Sergio van Dijk - 21球
西爪哇著名球隊萬隆同以往一樣都係聯賽大熱門，財力係東南亞第一，比馬來西亞柔彿、泰國蒙通聯更有錢，不過有錢唔係大晒嘅！有錢唔係一定成功嘅！今季球隊購得多名國腳級球員包括守門員I Made Wirawan、邊後衛Supardi Nasir、攻擊中場Firman Utina、邊路中場Muhammad Ridwan等，外援方面更引入日本射手足立原健二、派牌好手喀麥隆「美斯」Mbida Messi等，最巴閉莫過於獲得前澳職聯射手、印尼歸化國腳Sergio van Dijk加盟，呢位射手加盟之後攻力大增，曾經獲得7連勝嘅佳績，但後期佩斯普拉已宣佈屈機成功，於是乎萬隆突然收油，改派更多新人上陣，最終只能奪得第四。如果以財力計算，萬隆係印尼最強勁，但同以往一樣都係有頭威冇尾勢！今季嘅成績一般，睇黎都要檢討吓啲錢點洗好喇！
第五位：Sriwijaya(斯里維加亞)
成績：17勝6和11負
得失球：56球失61球
球隊射手：Boakay Foday、Tantan - 9 球
上屆冠軍斯里維加亞今年表現冇上屆咁好，主因係呢支蘇門答臘球隊季前放走好多主力，雖然Ferry Rotinsulu、Ponaryo Astaman等幾名一線土砲球員留隊，Fandy Mochtar、Ramdhani Lestaluhu呢2位表現良好嘅球員都加盟其中，又發掘咗Tantan呢位年到30嘅新射手，又有Muhammad Shobran、Dodok Anang呢啲表現好平穩嘅老將，在加上2名利比里亞國腳Erick Weeks Lewis、Boakay Eddie Foday，巴西射手Hilton Moreira、南韓U23國腳李東元及東帝汶國腳Diogo Santos嘅加盟，整體上計雖然冇上年咁強，但實力唔會太差。起初幾場成績一般，作客婆羅洲2場慘敗，但之後愈打愈好，試過6連勝。下半季將Diogo Santos外借，Hilton Moreir離隊，從萬隆手中接收喀麥隆射手Herman Dzumafo Epandi，試圖加強攻力追近龍頭佩斯普拉，但事與願違，佩斯普拉提前奪冠，斯里維加亞愈戰愈Hea，最近已經5場不勝。
上屆以79分奪冠嘅斯里維加亞，總入場人數有36萬多，升幅係105.3%，每場平均2萬多人入場，今年只拿第五，入場人數明顯下跌，總入場人數只有26萬多，所以話，勝利球迷全世界都有，唔好特別標籤某啲地方。
第六位：Barito Putra(巴力圖)
成績：15勝9和10負
得失球：球失球
球隊射手： Djibril Coulibaly - 21球
來自婆羅洲南部嘅球隊，今季ISL升班馬，季初組軍之土砲班底都係失意軍及2-3線球員，包括前國腳守門員Dian Agus、升班功臣Aditya Harlan、Fathlul Rahman，從北乾巴魯轉投而來嘅中堅Cima、Nehemia Solossa等等...在加上利比里亞國腳Sackie Teah、土庫曼國腳Mekan Nasyrow、馬里小國腳Djibril Coulibaly等外援助陣，從陣容上睇，係其中一隊降班大熱，但開季後愈戰愈勇，變成黑馬，下半季年青中場Rizky Ripora、國腳級快翼Oktovianus Maniani以及另一馬里外援Makan Konaté加盟，令球隊喺5月曾經獲得5連勝，最終排名第6。
巴力圖冇雄厚嘅財力，冇咁多一線球員，外援亦冇咩名氣，但點解可以拎到咁好嘅成績？好簡單，因為「夾」。
第七位：Persisam Putra Samarinda(佩斯森)
成績：14勝8和12負
得失球：59球失51球
球隊射手： Lancine Koné - 18球
來自婆羅洲東部嘅球隊，今季初嘅陣容雖然唔係最強，但絕對係一隻黑馬，土砲班底有Usman Pribadi、Muhammad Roby、Ferdinand Sinaga、Supriyono Salimin等好波之人，外援有前喀麥隆國腳Njanka及科特迪瓦攻擊中場Lancine Koné等，都係猛料外援，不過可能實力真係太''中間''，下半季中段時間已經宣佈既不能升又既無需降，可能太放鬆去打輸贏不在重要嘅關係，於是乎未段時間試過連輸5場，雖然排第7但球迷插到爆炸。
第八位：Persiram Raja Ampat(佩斯拉曼)
成績：11勝12和17負
得失球：41球失37球
球隊射手：James Koko Lomell - 17球
西巴布亞潛水聖地四王島球隊佩斯拉曼係上季其中一隊降班大熱，後期愈戰愈勇最終留低，由於資金有限，今季繼續以二線巴布亞原住民球員為班底，加入喀麥隆中堅Seme Pattrick、前利比里亞國腳中堅Kubay Quaiyan、利比里亞國腳前鋒James Koko等等嘅外援，以穩守突擊為主，最終排名第8超出預期，Seme及Kubay兩對中堅合拍得好，球隊只係失咗37球，係18隊中第3少，人選有限之下防守能力算唔錯，能夠喺有限資金下拎到呢個排名更加係超晒標！
第九位：Gresik United(錦石聯)
成績：12勝9和13負
得失球：41球失45球
球隊射手：松永祥兵 - 9球
東爪哇球隊錦石聯上季死過返生唔洗降班，今季實行大改革，清咗唔少老將走，除咗提拔數名U21精英，更邀得「老翻陳7」Riski Novriansyah、Siswanto等本土年青力量加盟其中，外援方面更有巴拉圭射手Aldo Barreto、日本中場松永祥兵等助陣，但季初成績一般，試過11場不勝，到咗季中才有好轉，最終排名第9完成今季聯賽。
上季主場非常火爆之錦石聯今季受到戰績浮沉而影響入座率，今季平均入場人數比上季小得多，但每一場依然有為數幾百人嘅錦石聯死忠到場支持，呢班球迷不論喺幾時都會著黃衣打晒鼓燒晒煙花唱住歌支持球隊，所謂真球迷，往往要喺球隊逆境下先會被發現。
第十位：Madura United(馬都拉聯)
成績：12勝7和15負
得失球：42球失51球
球隊射手：Zaenal Arief – 9球
東爪哇馬都拉島球隊馬都拉聯係2013 ISL升班馬，班底以年青2-3線土砲加前國腳Zaenal Arief等數位經驗球員，在加上前多哥國腳Ali Khaddafi、前荷蘭小國腳Emile Linkers、尼日利亞前鋒Saha等外援組成，由於呢班球員實力一般，所以佢地目標係護級，最後都可以拎到第十位，明年可以繼續，對於熱血非常之馬都拉球迷黎講，收貨！
第十一位：Persela Lamongan(佩西拉)
成績：10勝11和13負
得失球：56球失46球
球隊射手：Samsul Arif - 13球
東爪哇球隊佩西拉近年經常傳出財困消息，又話有球員因為半年冇糧出擺工，是真是流佢地先知，但今季陣容依然可以保留到Choirul Huda、Zaenal Arifin、阿根廷中場Gustavo López、Mario Costas等主力，另外加入唔少棄將及失意軍，包括佩斯寶射手Samsul Arif。起初佩西拉試過喺下游位置浮沉，但去到5月表現轉好試過6場不敗，其中主場9比1大勝北乾巴魯創出ISL成立以來最大比分差距，最終無需降班明年繼續。
雖然佩西拉嘅成績近年一般，今季入場人數不及上季，但佩西拉球迷依然係較瘋狂嘅其中一群，有幾場波係嚴重超載的。
第十二位：Persija Jakarta(佩斯查)
成績：12勝6和16負
得失球：46球失45球
球隊射手： Emmanuel Kenmogne - 14球
來自西爪哇雅加達嘅球隊，亦係印尼其中一支最大影響力嘅球隊，作為一支地位咁重要嘅球隊，由2001年拎咗冠軍之後，佩斯查每一季嘅陣容都唔差，但就係同冠軍無緣，今季呢？上季嘅失敗令佩斯查一口氣清咗10幾名球員，「精神領袖」Bambang Pamungkas都走埋，令球迷感到可惜。今季佩斯查保留咗Ismed Sofyan、Sudaryono、Anindito、Ngurah Wahyu等上季主力球員，在引入咗唔少23歲以下嘅年青球員，有啲係自加青訓成品，有啲喺次級聯賽踢過，另加3名外援Robertino Pugliara、Fabiano Beltrame及朴京敏，呢支佩斯查新老交替，唔少球迷都唔睇好佢地，唔相信佢地會喺上游企得穩，結果呢？上半季只有12分，排聯賽尾2，試過連輸6場，下半季當然要加碼，邊路球員Muhammad Ilham重返球隊，飛走朴京敏借咗港腳林學曦，尼泊爾中/後場球員Rohit Chand由北乾巴魯來投，最重要喀麥隆前鋒Emmanuel Kenmogne加盟令攻力大增，下半季重上軌道，一口氣拎咗30分，總算脫離降班危機。
第十三位：Persiba Balikpapan(佩斯巴)
成績：10勝10和14負
得失球：42球失48球
球隊射手： Syakir Sulaiman - 9球
來自婆羅洲東部嘅球隊，上季有多名主力離隊，因此Wawan Hendrawan、Mudana等失意球員加盟、加上Absor Fauzi、Turnando等U21梯隊提拔上黎嘅年青力量，就係佩斯巴本土班底，而外援方面佩斯巴一試試咗成10個，最後都係揀咗巴西嘅Diego Santos、喀麥隆嘅Nzekou、新加坡嘅Emuejeraye及黎巴嫩國腳Mahmoud El Ali，Diego Santos打咗1場都唔夠就走咗，呢個時候另一名黎巴嫩球員Mostafa El Qasaa都加盟其中，起初還叫不過不失，但去到季中佩斯巴決定放棄新加坡嘅大隻中堅Emuejeraye，黎巴嫩國腳Mahmoud El Ali都離開咗，呢個時候南韓前鋒金永光及馬里中堅Franck Bezi趕及加盟，逃出佩斯寶嘅利比里亞攻擊中場Alex Robinson都來到，但係下半季成績反而更衰，曾經跌過落去15名以下，幸好尾段聯賽發力先和萬隆在勝已擺明等放假嘅斯里維加亞，最後在贏佩利達，先唔洗去打升降附加賽。
第十四位：Persita Tangerang(佩斯迪)
成績：9勝11和14負
得失球：34球失52球
球隊射手： 球
西爪哇球隊佩斯迪係今季其中一支升班馬，2000年試過奪得印尼甲組冠軍(當時頂級聯賽)，今次能夠在現身於頂級聯賽，都唔敢將目標放遠，因為人選有限，Arfani、Ramandika、Ramadhan、Bachtiar等等嘅土砲球員，都唔係一線球員，智利外援Luis Durán、Cristian Carrasco、金東燦亦唔係十分犀利，所以要為護級努力都不足為怪，最終佩斯迪喺最後時刻作客擊敗佩斯華，可以留低已經唔錯。
呢隊波確係冇乜好講，始終今非昔比，財力不足，冇乜焦點球員，Cristian Carrasco會喺入波之後喺條底褲內拎個蜘蛛俠頭套出黎已經勉強算係焦點，但值得一提，佩斯迪夠彊起用多名年青球員，好似只有23歲嘅Rishadi Fauzi，分分鐘成為印尼國家隊未來力量。
第十五位：Pelita Bandung Raya(佩利達)
成績：7勝13和14負
得失球：44球失51球
球隊射手： Gaston Castano - 16球
來自西爪哇嘅球隊，上幾季以''Pelita Jaya''為名，根據地位於Karawang(加拉旺)，不過今季轉咗根據地去萬隆，改咗名做''Pelita Bandung Raya''，其實''Pelita Bandung Raya''係佩利達起初嘅名稱，根據地本來就喺萬隆，但搬咗主場去加拉旺後，開始儲到一批支持者，慢慢地佩利達變成加拉旺地區球隊，可是今年忽然復甦變返做''Pelita Bandung Raya''，用返萬隆做根據地，結果每場一千幾百人入場，場面冷清。
講返球隊，上季佩利達季終球員四散，有啲去咗阿雷馬，有啲去IPL、次級聯賽，今季佩利達嘅土砲班底都係2012年尾先揾齊腳，守門員Edi Kurnia曾經踢過棉蘭、邦坦，另一位守門員Tema Mursadat曾經踢過佩斯迪，後防方面除咗前國腳Nova Arianto比較有分量之外大部分都係2-3線球員及青年球員，中場及前鋒如Dolly Gultom、Rizky Pellu係名不經傳嘅2-3線球員及青年球員，在加入前晨曦澳洲外援米路雲洛域、塞爾維亞中場Obrić 、克羅地亞中堅Mijo Dadić及阿根廷射手Gaston Castano等外援組成，但可惜嘅係外援質數唔錯但土砲球員卻爭少少，季中米路雲洛域、Obrić走人，揾咗敘利亞前鋒Marwan Sayedeh及馬里前國腳Camara幫拖但成績依然一般，最不濟試過9場不勝，結果佩利達雖然唔洗直接降班，但要打升降附加賽。
第十六位：Persidafon Dafonsoro(佩斯達弗)
成績：8勝6和20負
得失球：39球失61球
球隊射手：Pape N'Diaye - 18球(下半季加盟佩斯達弗進11球)
與佩斯普拉同以查亞普拉作根據地嘅佩斯達弗就冇佩斯普拉咁光輝，今年一直喺下游苦苦掙扎，最終降班收場。與佩斯普拉、佩斯拉曼一樣，佩斯達弗以巴布亞原住民球員為主要班底，由前國腳Eduard Ivakdalam帶領一班名不經傳嘅年青球員，其實佩斯達弗陣中有數名球員之速度、技術、體能都唔差，比如只有22歲嘅Anis Nabar，但經驗依然要累積，今次佩斯達弗降班之因主要係上半季於尋找外援方面有困難，只能註冊2名質素一般嘅外援，對球隊幫助有限，冇計，錢嘅問題，儘管下半季後防有新加坡大隻中堅Precious Emuejeraye、中間有伊朗球員Jafad Moradi，前面有塞內加爾小國腳Pape Latyr N'Diaye加盟，但依然未能令佩斯達弗起死回生，Precious Emuejeraye一人之力未能拯救豆腐防線，伊朗球員Jafad Moradi、巴拉圭韓裔Samuel Lim Nuñez質素一般，Pape Latyr N'Diaye雖然係好波之人，但來得太遲。
第十七位：Persiwa Wamena(佩斯華)
成績：9勝3和22負
得失球：32球失62球
球隊射手：-Guy Junior Ondoua( 安杜) - 9球
巴布亞省高原球隊佩斯華雖然有高原地獄主場，但今年卻不能在起作用。季前佩斯華保留咗唔少土砲球員，包括巴布亞第一中堅Yesaya Desnam、Konon Wombon、Romaropen等巴布亞原住民球員，而且請得非原住民Firmansyah、Kuswanto、Hamzah等失意球員加入，後備以U21梯隊提拔上去嘅年青巴布亞原住民為主，在加埋外援O.K. John、Guy Junior Ondoua(安杜)、Camara、Khorsandipish Kenari及金勇熙，睇落都知冇冠軍格，上游都未必得，但降班就未到佢地個隻。去到半季，佩斯華果然排名中游位置，但係問題來了，資金方面又有問題，結果走嘅就走，其中一個攻擊主力兼射手Camara走咗對佩斯華打擊好大，喺中間非常重要嘅Romaropen又因為打球證被終身停賽，又撞正數名主力受傷，因為冇咩錢只係註冊咗一名巴西外援Maxwel Da Cruz準備下半季比賽，結果輸多贏小，高原地獄主場作用不在，儘管最後時刻Yesaya Desnam、Guy Junior Ondoua、O.K. John復出，但太遲了。
首屆ISL舉行即獲亞軍，過往主場贏波成功率達9成，今年卻因為傷兵、冇錢搞到降班，ISL又少一支巴布亞球隊。
第十八位：PSPS Pekanbaru(北乾巴魯)
成績：4勝5和25負
得失球：25球失101球
球隊射手：Muhammad Isnaini - 5球
與新加坡、馬來西亞地理上接近嘅蘇門答臘城市廖內省球隊北乾巴魯季初仲係朝氣蓬勃，雖然球隊主要以2-3線土砲球員做班底，但都揾咗馬里中場Makan Konaté、塞內加爾小國腳前鋒Pape Latyr N'Diaye、尼泊爾國腳Rohit Chand等外援幫手，但不久後球隊資金方面出現問題，未到季中已經有球員冇糧出而擺操、拒絕出賽嘅消息傳出，季中轉會窗一打開所有外援走清光，可以走嘅土砲球員都走埋，最後變成「老翻佩斯寶」，因為財困實力削弱。本來北乾巴魯已經算係弱旅，季前已經係降班熱門之一，由於走咗唔小球員，北乾巴魯只好急簽一啲冇乜大賽經驗嘅新丁填補空缺，喺無錢請外援全無外援協助之下，下半季嘅北乾巴魯都係輸多贏少，實力嘅差距令北乾巴魯不得不打定輸數提早準備降班，由6月12日起至今已經11連敗，但係北乾巴魯冇模仿佩斯寶嘅包皮精神，就算輸得大大獲都照頂，算係咁。(雖然，有啲比賽過程好詭異...)