2013南亞國家盃（或叫錦標賽）嘅決戰喺香港時間今晚8點9會打，雖然呢個國家盃嘅水平係亞洲圍內係最弱，焦點係最低，而且完全唔關香港事因為連馬會都廢事開盤，但係身為一個關注亞洲足球發展嘅球迷黎講，南亞國家盃實在係唔可以錯過，而且近兩屆You Tube有免費現場直播，更加令我有興趣善用網路資源去睇睇呢個所謂WFC嘅國家盃。南亞國家盃表面上好似唔關香港足球事，但香港嘅國家隊、球會間唔中都會對住呢一班對手，其實見到嘅球員例如 Sandip Nandy、Sunil Chhetri、Imran Mohamed、Ali Ashfaq 等黎過香港多次，都熟口熟面，而且籍住呢個所謂 WFC 嘅國家盃都可以叫做勉強了解到呢堆國家嘅足球水平去到邊，叫做睇多啲學吓嘢啦，W 唔 WFC 真係好個人嘅啫，就好似黎緊嘅亞協盃8強，有人話仲係 WFC 喎。
講返南亞盃，印度拎個6次冠軍，呢個盃93年舉辦第一屆，不過我由2008年先開始正式關注，個時睇網上直播1分鐘斷一次，唔想斷就要俾錢，一蚊美金都唔俾嘅我不停F5地見證印度洋小國馬爾代夫由分組賽殺入最後決賽，擊敗大熱門印度，拎咗首次南亞國家盃冠軍，十億人口大國印度輸比三十萬人口小國馬爾代夫，證明人口多少同實力完全冇關係，第二日馬爾代夫首都馬律有幾萬人遊街慶祝，就算我只係一個遙遠旁觀者，都感受到佢地個種高興，不過最令我印像深刻係不被睇好嘅不丹首次打入4強，仲要打到加時先比印度淘汰，對於一支由業餘球員組成嘅國家隊黎講，能夠打入4強仲要攪到清一色所謂全職業嘅印度隊咁尷尬，已超晒標，佢地有啲球員基本功都一般，但可以憑住堅定意志完成呢次比賽，真係好熱血。
2011個屆到阿富汗發功，本來以往只係南亞國家盃魚腩，今屆變成黑馬。塔利班倒台後，阿富汗足總立即成立番並重返國際舞台，起初阿富汗足總已揾咗唔少喺德國踢業餘比賽嘅血統球員幫國家隊踢比賽，但初期成效唔大，對住尼泊爾、斯里蘭卡都輸晒，2003年仲以0比11不敵土庫曼，2005年比馬爾代夫炒9粒，去到2007年成績先有好轉，2011個屆南亞國家盃仲打到去總決賽。
依家嘅阿富汗國家隊排名比香港仲要高，同菲律賓一樣都係用海歸政策，球員有啲來自德國、荷蘭、美國、印度聯賽，雖然實力仲係喺亞洲未夠班，但去到南亞盃上就唔同講法。除咗南亞盃之外，阿富汗另一任務係下年嘅挑戰盃冠軍，冠軍可以拎到亞洲盃入場券，對手有土庫曼、菲律賓、馬爾代夫、緬甸、吉爾吉斯、巴勒斯坦、老撾，都唔係冇機會架。
至於印度呢，依然係繼馬爾代夫後嘅一隊清一色全職業國家隊，請咗前荷蘭國腳 Wim Koevermans 黎教，守門員有高大嘅 Subrata Pal，後面有能攻能守嘅 Gouramangi Singh、高佬 Sandesh Jhingan，中間有創造力高嘅 Syed Nabi，前面有 Sunil Chhetri、混血兒 Robin Singh、『新般迪亞』 JeJe，但又如何？今次南亞國家盃差少少比尼泊爾同巴基斯坦搞到出局！4強對馬爾代夫贏得好辛苦，挑戰盃又冇得踢，只好希望拎番個南亞國家盃打打飛機，不過係咪真係打到飛機呢？留意今晚囉。
阿富汗2-0勝印度
2013年南亞盃決賽，阿富汗2-0勝印度，阿富汗國家隊獲得重返國際舞台後嘅首個冠軍！今日係911，12年前嘅今日世貿倒下，美國立刻出兵鳩炸阿富汗順手拉倒塔利班。正喺今日911，被鳩炸完傷痕累累嘅阿富汗，國家足球隊喺南亞盃打到去決賽，最後仲要贏埋添，真係咁啱呢。
印度其實打得唔差，只係把握唔到就係把握唔到，人地守得好就係守得好，你中楣就係中楣。挑戰盃預賽失利，南亞盃決賽又失利，印度連最後飛機都打唔成，不過印度足總有好多未來改革計劃，睇落好認真，南亞盃一向喺佢地世界，拎少一次應該冇乜所謂，佢地嘅重點係搞好本土聯賽，在次進軍亞洲盃。
如今阿富汗第二個目標就係拎亞洲挑戰盃冠軍在參加2015年亞洲盃決賽週，對手有土庫曼、菲律賓、馬爾代夫、緬甸、吉爾吉斯、巴勒斯坦、老撾，仲未分組，今次打南亞盃嘅阿富汗仲有幾名主力喺海外，不過實力與現時睇到嘅差唔多，即係同印度咁上吓，得唔得呢？